მიანმარში, სადაც სამხედრო გადატრიალების წინააღმდეგ საპროტესტო აქციები მიმდინარეობს, პოლიციამ დემონსტრანტების დასაშლელად რეზინის ტყვიები და წყლის ჭავლი გამოიყენა, - ამის შესახებ ინფორმაციას Reuters-ი ავრცელებს.

სააგენტოს ცნობით, დედაქალაქ ნაიფიიდოში რეზინის ტყვიებით ოთხი ადამიანი დაშავდა, მათ შორის ერთი ქალია, რომელსაც დაზიანება თავის არეში აღენიშნება.

თვითმხილველები აცხადებენ, რომ დედაქალაქში გამართული საპროტესტო აქციის დასაშლელად სამართალდამცავებმა ცეცხლსასროლი იარაღით ჰაერში რამდენიმე გასროლა განახორციელეს. მანამდე კი მათ მომიტინგეების წინააღმდეგ წყლის ჭავლი გამოიყენეს, რის საპასუხოდაც აქციის მონაწილეებმა პოლიციას პიროტექნიკა დაუშინეს.

ამასთან, პოლიციამ ქალაქ მანდალაიში სულ მცირე 27 დემონსტრანტი დააკავა.

შეგახსენებთ, მიანმარში საპროტესტო აქციები რამდენიმე დღეა მიმდინარეობს. მოქალაქეები 1-ელ თებერვალს მომხდარ სამხედრო გადატრიალებას აპროტესტებენ, როდესაც არმიამ, რომელიც გასული წლის ნოემბერში ჩატარებული არჩევნების შედეგებს არ აღიარებს, ქვეყნის არჩეული ლიდერი აუ სან სუ ჩი დააკავა და ერთწლიანი საგანგებო მდგომარეობა გამოაცხადა.