სომხეთსა და აზერბაიჯანს შორის ტყვეების გაცვლის მორიგი პროცესი განხორციელდა.

აზერბაიჯანული მედიის ინფორმაციით, სომხურმა მხარემ აზერბაიჯანს ერთი ტყვე გადასცა, აზერბაიჯანმა კი სომხებს 5 ტყვე დაუბრუნა.

„დღეს ომის ტყვეების კიდევ ერთი გაცვლა განხორციელდა. ჩემი პირადი კონტროლის ქვეშ რუსი სამშვიდობოების მიერ ჩატარებული სამუშაოს შედეგად, რუსეთის თვითმფრინავმა ბაქოში ჩაიყვანა ტყვეობაში მყოფი ერთი ადამიანი, 5 ტყვე კი ერევანში დაბრუნდა,“- განაცხადა მთიან ყარაბაღში განლაგებული რუსი სამშვიდობოების მეთაურმა, გენერალ-ლეიტენანტმა რუსტამ მურადოვმა.

შეგახსენებთ, გასული წლის 9 ნოემბერს აზერბაიჯანისა და რუსეთის პრეზიდენტებისა და სომხეთის პრემიერ-მინისტრის მიერ ხელმოწერილი სამმხრივი განცხადება, რომელმაც მთიან ყარაბაღში 27 სექტემბერს დაწყებული საბრძოლო მოქმედებები დაასრულა, სხვა პირობებთან ერთად, სომხურ და აზერბაიჯანულ მხარეებს შორის ტყვეების გაცვლასაც ითვალისწინებს.