მელია საკუთარ თავთან მიმართებაში გადაწყვეტილებას თვითონ იღებს - სწორედ მისი საქციელის ადეკვატური იქნება ყველა ის გადაწყვეტილება, რაც კონსტიტუციით, კანონითა და პარლამენტის რეგლამენტით არის გათვალისწინებული, - ასე უპასუხა დეპუტატმა დავით მათიკაშვილმა კითხვას, თუ რა სამართლებრივი რეაგირება შეიძლება მოჰყვეს მელიას მიერ გირაოს არგადახდას.

როგორც მათიკაშვილმა ჟურნალისტებს განუცხადა, არავის უნდა ეგონოს, რომ პოლიტიკოსობა, პარტიის ლიდერობა ინდულგენციას წარმოადგენს, რომ მართლმსაჯულებას თავი აარიდო.

„საზოგადოებამ საქმის შინაარსი ძალიან კარგად იცის. როგორ ხულიგნურად იქცეოდა ის, როცა სამაჯური ფაქტობრივად საზოგადოებას ესროლა. მელია საკუთარ თავთან მიმართებაში გადაწყვეტილებას თვითონ იღებს, ხოლო სამართლებრივი პროცესები იქნება ადეკვატური იმისა, თუ როგორ გადაწყვეტილებას მიიღებს. მელიას საქციელის ადეკვატური იქნება ყველა ის გადაწყვეტილება, რაც კონსტიტუციით, კანონით და პარლამენტის რეგლამენტით არის გათვალისწინებული“, - განაცხადა დავით მათიკაშვილმა.