ნიკოლოზ სამხარაძემ უკრაინის რადას საგარეო ურთიერთობათა კომიტეტის თავმჯდომარესთან ონლაინ შეხვედრა გამართა

პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ უკრაინის რადას საგარეო ურთიერთობათა კომიტეტის თავმჯდომარე ალექსანდრ მერეჟკოსთან ონლაინ შეხვედრა გამართა. ამის შესახებ „ინტერპრესნიუსს“ საქართველოს პარლამენტიდან აცნობეს.

მათივე ინფორმაციით, შეხვედრაზე მხარეებმა საქართველო-უკრაინის სტრატეგიული ურთიერთობები განიხილეს.

უკრაინის მხარემ აღნიშნა, რომ საქართველო იმ ხუთი ქვეყნიდან ერთ-ერთია, რომელთანაც უკრაინას სტრატეგიული პარტნიორობა აკავშირებს. შესაბამისად ხაზი გაესვა არა მხოლოდ სამთავრობო დონეზე, არამედ საპარლამენტო დონეზე თანამშრომლობის, ასევე სამმხრივ, საქართველო - უკრაინა - მოლდოვის ფორმატში ურთიერთობების გააქტიურებას.

უკრაინელმა კომიტეტის თავმჯდომარემ ქართველი კოლეგა კიევში მიიწვია ოფიციალური ვიზიტით, თუმცა პანდემიის გამო ასეთი ვიზიტების განხორციელება ჯერ შეუძლებელია. ამიტომ, ვიდრე ვიზიტები აღდგება, მხარეები ონლაინ რეჟიმში გაერთიანებული კომიტეტების სხდომის ჩატარებაზე შეთანხმდნენ, სადაც ორივე ქვეყნისთვის მნიშვნელოვან საკითხებს განიხილავენ, როგორიცაა დეოკუპაცია, ევროკავშირსა და ნატო-ში ინტეგრაცია. ასევე ერთობლივად იმუშავებენ უცხოელ პარტნიორებთან საქართველოს და უკრაინის დღის წესრიგის განხორციელებაზე.

„შეხვედრაზე ასევე, მოკლედ შევეხეთ უკრაინის ელჩის მიმართ გამოთქმულ უსაფუძვლო ბრალდებებს, რომელიც ექსპრეზიდენტ სააკაშვილის მხრიდან იყო გამოთქმული და ორივე მხარემ გავიზიარეთ ის სულისკვეთება, რომელიც გუშინ უკრაინის საგარეო საქმეთა სამინისტროს განცხადებაში იყო გამოთქმული, რომ ეს უბრალოდ მონაგონი ჭორია. ჩვენ ძალიან მაღალი შეფასება მივეცით უკრაინის ელჩის საქმიანობას საქართველოში და ასევე უკრაინული მხრიდანაც და ჩვენი მხრიდანაც ხაზგასმით ითქვა, რომ ვერც ერთი კონკრეტული პიროვნება ვერ დააზიანებს ქართულ-უკრაინულ მეგობრობას და პარტნიორობას.

ასე რომ, ჩვენ ძალიან პოზიტიური დღის წესრიგი შევქმენით და უკვე დავიწყებთ გაერთიანებული კომიტეტის სხდომის დაგეგმვას, ჯერ ონლაინ რეჟიმში და ალბათ უკვე ზაფხულში დაიწყება ჩვენს ქვეყნებს შორის ვიზიტების გაცვლა", - განაცხადა პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ შეხვედრის დასრულების შემდეგ.

ზურაბ ბატიაშვილი - ხელისუფლებას აქვს მარტივი არჩევანი - ან დასავლეთთან ერთად ან დასავლეთის წინააღმდეგ, ამ არჩევანში თუ დასავლეთის და საკუთარი ხალხის წინააღმდეგ წავლენ, ხელისუფლებას მალევე დაკარგავენ
ქართული პრესის მიმოხილვა 03.03.2021
კახა გოგოლაშვილი - ევროკავშირის მედიაცია გახდა ინსტრუმენტი, რომელიც არ არის ერთჯერადი, სანამ კრიზისი არ მოგვარდება, ევროკავშირი ამ პროცესში ჩართული იქნება
იურიდიული პირები პროკრედიტ ბანკში ანგარიშებს დისტანციურად გახსნიან