„ლეიბორისტული პარტიის“ ოფისში ოპოზიციის შეხვედრა მიმდინარეობს. როგორც შეხვედრის დაწყებამდე ოპოზიციური პარტიის ლიდერებმა განაცხადეს, დღევანდელ შეხვედრაზე განსახილველი ერთ-ერთი მთავარი თემა იქნება, როგორ დაუპირისპირდება ოპოზიციური სპექტრი ნიკა მელიას დაკავებას.

„დღეს ვიმსჯელებთ სხვადასხვა საკითხზე. აქ იქნება მომავალი ტაქტიკა, სტრატეგია ოპოზიციის. ვიმსჯელებთ ნიკა მელიას გარშემო შექმნილ სიტუაციაზე. არამარტო ნიკა მელიაზე, არამედ ყველა პოლიტიკურად შეკერილ საქმეზე.

რაც შეეხება აქციებს, რას მოვიმოქმედებთ, რა ერთობლივი გეგმა გვექნება, დღეს განვიხილავთ. ადრეც განვაცხადეთ, რომ აქციები და მშვიდობიანად გამოხატვა აზრის არის კონსტიტუციით გარანტირებული ერთ-ერთი მეთოდი ხელისუფლებაზე ზეწოლის და რა თქმა უნდა, გამოყენებული იქნება არამარტო მელიასთან, არამედ სხვა აქტუალურ თემებთან დაკავშირებით“, - განაცხადა “სტრატეგია აღმაშენებლის” ლიდერმა, სერგო ჩიხლაძემ.