თამარ ჟვანია ამაზე პასუხს აუცილებლად აგებს, მე ვერ გეტყვით დღეს ის წავა თუ არა, ახლა ისეთი არეულობაა „ოცნებაში“ ნამდვილად ძაღლი პატრონს ვერ ცნობს და ვინ მიდის, ვინ რჩება და ვინ სად არის, არავინ იცის, - ამის შესახებ განცხადება „ევროპული საქართველოს“ ლიდერმა დავით ბაქრაძემ გავრცელებული ინფორმაციის საპასუხოდ გააკეთა, რომლის მიხედვითაც ცესკო-ს ხელმძღვანელმა თამარ ჟვანიამ შესაძლოა თანამდებობა დატოვოს.

ბაქრაძის განცხადებით, თამარ ჟვანია არა მხოლოდ თანამდებობას დატოვებს, ის აუცილებლად აგებს პასუხს არჩევნების გაყალბებისთვის.

„როგორც გუშინ მოვისმინეთ ამერიკის საელჩოს განცხადებაში, დღევანდელი კრიზისის ერთ-ერთი მიზეზი არის საარჩევნო სისტემა საქართველოში ანუ გაყალბებული არჩევნები, აქედან დაიწყო კრიზისი, ამიტომ თამარ ჟვანია ამაზე პასუხს აუცილებლად აგებს. მე ვერ გეტყვით დღეს ის წავა თუ არა, ახლა ისეთი არეულობაა „ოცნებაში“ ნამდვილად ძაღლი პატრონს ვერ ცნობს და ვინ მიდის, ვინ რჩება და ვინ სად არის, არავინ იცის, მითუმეტეს, არ ვიცი მეც, მაგრამ ვიმეორებ, თამარ ჟვანია აუცილებლად წავა, იმიტომ, რომ გზა ამ ქვეყანაში დამშვიდებისკენ, ნორმალური მომავლისკენ და ჩვენი უკეთესი ცხოვრებისკენ გადის იმაზე, რომ თამარ ჟვანიები, გამყალბებლები, მოძალადეები, ადამიანები, რომლებიც ასრულებენ პოლიტიკურ დაკვეთას და ამით შეჰყავთ ქვეყანა კრიზისში, უნდა წავიდნენ, უნდა იყოს საარჩევო რეფორმა, უნდა შედგეს შეთანხმება ახალ არჩევნებზე და საქართველოს უნდა მართავდეს ის ხელისუფლება, ვისაც ექნება ხალხის მანდატი და არა თამარ ჟვანიასა და მისნაირების მანდატი. ამიტომ ჟვანია დღეს იქნება თუ ხვალ, აუცილებლად წავა. ჩვენი ამოცანა ჟვანიასთან ბრძოლა არ არის, ჩვენი ამოცანაა სისტემასთან ბრძოლა იმისთვის, რომ ამ ქვეყანაში გაყალბება, პოლიტიკური დევნა და ძალადობა ერთხელ და სამუდამოდ, დასრულდეს!“- განაცხადა ბაქრაძემ.