ათენში გამართულ აქციაზე, სადაც 5 000-ზე მეტი მოქალაქე პოლიციის მიერ ჩადენილ ძალადობას აპროტესტებდა, 3 სამართალდამცავი დაშავდა, - ამის შესახებ ინფორმაციას BBC-ი ადგილობრივ პოლიციაზე დაყრდნობით ავრცელებს.
მათივე ინფორმაციით, ერთ-ერთი დაშავებულის მდგომარეობა მძიმეა. საბერძნეთის პოლიციის ცნობით, აქციის მონაწილეების ერთმა ჯგუფმა, ნიღბიანმა ადამიანებმა სამართალდამცავებსა და პოლიციის შენობას ქვები დაუშინა, რასაც პოლიციამ ცრემლსადენი გაზითა და წყლის ჭავლით უპასუხა.
მედიის ინფორმაციით, სამართალდამცავებმა სულ მცირე 10 ადამიანი დააკავეს. ათენის გარეუბანში, ნეა სმირნის მოედანზე მოქალაქეები ამავე ადგილზე გადაღებული ვიდეოს გავრცელების შემდეგ შეიკრიბნენ. ვიდეოში ასახულია, როგორ სცემს პოლიციელი ხელკეტით მამაკაცს კორონავირუსის გამო დაწესებული „ლოქდაუნის“ წესების დარღვევისთვის.