„წითელი ხაზი“ ჩვენი აკვიატება არ არის, ეს არის ჩვენი სახელმწიფოს, ჩვენი კონსტიტუციის და მოქალაქეების არჩევანის თავისუფლების დაცვა,- ამის შესახებ საპარლამენტო უმრავლესობის წევრმა მიხეილ ყაველაშვილმა, დიალოგთან დაკავშირებით, ჟურნალისტებთან განაცხადა.
როგორც მან აღნიშნა, მმართველი გუნდი დიალოგისთვის მზად არის და ყველა საკითხზე აქვს არგუმენტები.
რაც შეეხება ოპოზიციას, როგორც ყაველაშვილი აღნიშნავს, როცა ისინი არჩევნების გაყალბებაზე საუბრობენ, მტკიცებულებები უნდა წარმოადგინონ.
„წითელი ხაზები“ ვინმეს აკვიატება არ არის. ეს არის არა "ქართული ოცნებისთვის" „წითელი ხაზები“, არამედ თითოეული მოქალაქისთვის განმსაზღვრელი, რომ როცა არჩევნები ჩატარდა და ადამიანებმა თავისუფალი ნება გამოხატეს და არჩევნებზე მივიდნენ, მათი შეურაცხყოფა იქნება ამ არჩევნების გადახედვა.
დაგვიმტკიცონ! 1%-იანი გადახრა მაინც თუ იქნება, მზად ვართ, რიგგარეშე არჩევნები დავნიშნოთ. ამაზეც წავედით და ამაზეც უარს ამბობენ”, - აცხადებს ყაველაშვილი.