11-12 მარტს, რუსეთის პრეზიდენტმა ვლადიმერ პუტინმა სატელეფონო საუბრები გამართა აზერბაიჯანის პრეზიდენტ ილჰამ ალიევსა და სომხეთის პრემიერ-მინისტრ ნიკოლ ფაშინიანთან.
როგორც კრემლის მიერ გავრცელებულ განცხადებაშია ნათქვამი, საუბისას განიხილეს მთიან ყარაბაღთან დაკავშირებით მიღწეული შეთანხმებების განხორციელების პრაქტიკული ასპექტები.
„კმაყოფილებით აღინიშნა, რომ ცეცხლის შეწყვეტის რეჟიმი მკაცრად არის დაცული და რეგიონში ვითარება ზოგადად სტაბილური და მშვიდია. ილჰამ ალიევმა და ნიკოლ ფაშინიანმა მაღალი შეფასება მისცეს რუსული სამშვიდობო კონტინგენტის ეფექტურ მოქმედებებს“, - წერია კრემლის მიერ გავრცელებულ განცხადებაში.
საუბრისას მხარეები ასევე შეეხნენ სამხრეთ კავკასიაში ეკონომიკური და სატრანსპორტო კავშირების განბლოკვასთან დაკავშირებულ საკითხს და დადებითად შეფასდა ამ კონტექსტში სამუშაო ჯგუფის საქმიანობა. მხარეებმა მოსაზრებები გაცვალეს რუსეთ-აზერბაიჯანისა და რუსეთ-სომხეთის თანამშრომლობის აქტუალურ თემებზეც.