აშშ-ის პრეზიდენტი ჯო ბაიდენი აცხადებს, რომ ნიუ-იორკის შტატის გუბერნატორი ენდრიუ კუომო თანამდებობიდან უნდა გადადგეს, თუ გამოძიება სექსუალური ხასიათის გადაცდომებთან დაკავშირებით მის წინააღმდეგ წაყენებულ ბრალდებებს დაადასტურებს.
„უნდა ჩავთვალოთ, რომ ქალი სიმართლეს ამბობს და ის განტევების ვაცი და მსხვერპლი არ უნდა გახდეს იმის გამო, რომ ინფორმაცია გააჟღერა. უნდა ჩატარდეს გამოძიება იმის დასადგენად, არის თუ არა მისი ნათქვამი სიმართლე“, - განაცხადა ჯო ბაიდენმა.
სექსუალური ხასიათის გადაცდომებში ნიუ-იორკის შტატის გუბერნატორს რამდენიმე ქალი ადანაშაულებს. აღნიშნულის გამო, რამდენიმე დღის წინ სენატორებმა, ჩაკ შუმერმა და კირსტენ ჯილიბრენდმა კუომოს გადადგომისკენ მოუწოდეს.
გასულ კვირას ნიუ-იორკის შტატის გენერალურმა პროკურორმა ლეტიტია ჯეიმსმა დაასახელა გუნდი, რომელიც კუომოს წინააღმდეგ ბრალდებებს გამოიძიებს.