საერთო-სამოქალაქო მოძრაობა „მრავალეროვანი საქართველო“, მიმართავს საქართველოს პრემიერ-მინისტრს და მთავრობის უწყებათაშორის საკოორდინაციო საბჭოს, ტრადიციული დღესასწაულის ნოვრუზის (ნოვრუზ-ბაირამის) თაობაზე თხოვნით, რათა 21 მარტის ღამეს, დროებით მოიხსნას არსებული გადაადგილების შეზღუდვა თბილისსა და ეთნიკური აზერბაიჯანელებით დასახლებულ მუნიციპალიტეტებში.

ორგანიზაციის ცნობით, ხალხური დღესასწაული - ნოვრუზ-ბაირამი, რომლის საქართველოში აღნიშვნაც მრავალ საუკუნეს ითვლის, პანდემიით გამოწვეული შეზღუდვების გამო 2020 წელს არასრულფასოვნად ჩატარდა.

„ამავე დროს, უახლოეს ისტორიაში, მოიძებნება შეზღუდვების დროებით მოხსნის პრაქტიკა, საერთო-სახალხო დღესასწაულის გამო - 7 იანვარს, რასაც შედეგად ეპიდემიოლოგიური გართულება არ მოჰყოლია.

ყოველივე ზემოთხსენებულის გათვალისწინებით, მრავალეროვანი საქართველო იმედს გამოთქვამს, რომ უწყებათაშორისი საკოორდინაციო საბჭო გაითვალისწინებს არსებულ გარემოებებს და პრაქტიკას და საშუალებას მისცემს, ქვეყნის ეთნიკურად აზერბაიჯანელ მოქალაქეებს, 2021 წლის 21 მარტს, ტრადიციულად, მასშტაბურად აღნიშნონ, საქართველოში ეროვნულ დღესასწაულად გამოცხადებული ნორვუზ-ბაირამი“, - ნათქვამია მიმართვაში.