ჯანდაცვის მინისტრის ეკატერინე ტიკარაძის განცხადებით, კორონავირუსის საწინააღმდეგო ვაქცინის მიმღებ გაფართოებულ ასაკობრივ ჯგუფში მოხუცებულთა თავშესაფრების ბენეფიციარები და პერსონალიც შედის. ამის შესახებ მან ჟურნალისტებს განუცხადა.
„თქვენ იცით, რომ 3000 ადამიანის ვაქცინაცია არის დღიური სამიზნე. იმ ჯგუფებში, რომელიც გაფართოვდა, 75 წელს ზემოთ შედიან მოხუცებულთა თავშესაფრების ბენეფიციარები და პერსონალი. რა თქმა უნდა, ისინიც შეუერთდებიან ვაქცინაციის პროცესს. რაც შეეხება ვაქცინაცინის შენახვის ვადებს, აქ ვადები დაცულია და რეალურად არანაირი რისკი ამ მიმართულებით არ გაგვაჩნია“, - განაცხადა ტიკარაძემ.
კითხვაზე, თუ ვაქცინის არსებული დოზები წლის ბოლომდე არ გაიხარჯა, რამდენად იქნება წლის ბოლოს კვლავ ვარგისი, ტიკარაძის განცხადებით, „ეს ვაქცინა წლის ბოლომდე არ გვექნება, უფრო ადრე გაიხარჯება“.