საბა ბუაძე - ხელისუფლების ვალდებულებაა გაასაჯაროვოს ყველა რუსი ვიზიტორის ვინაობა და დაადასტუროს, რომ დარღვეული არ აქვთ ოკუპირებული ტერიტორიების შესახებ კანონი და კოვიდრეგულაციების ნაწილი
„ლელო საქართველოსთვის“ ერთ-ერთი ლიდერის საბა ბუაძის განცხადებით, მაღალი საჯარო ინტერესიდან გამომდინარე ხელისუფლების პირდაპირი ვალდებულებაა, გაასაჯაროვოს ყველა რუსი ვიზიტორის ვინაობა და დაადასტუროს, რომ მათ დარღვეული არ აქვთ ოკუპირებული ტერიტორიების შესახებ კანონი და კოვიდრეგულაციების ნაწილი.
აღნიშნული განცხადება საბა ბუაძემ რუსი ჟურნალისტის ვლადიმერ პოზნერისა და მისი სტუმრების საქართველოში ჩამოსვლასთან დაკავშირებით განაცხადა.
მისი თქმით, ხელისუფლებამ ისიც უნდა დაამტკიცოს, რომ თავად არ დაურღვევია კანონი პოზნერისა და მისი სტუმრების საქართველოში შემოყვანით.
„მაღალი საჯარო ინტერესიდან გამომდინარე ხელისუფლების პირდაპირი ვალდებულებაა გაასაჯაროვოს ყველა რუსი ვიზიტორის ვინაობა და დაადასტუროს, რომ მათ დარღვეული არ აქვთ ოკუპირებული ტერიტორიების შესახებ კანონი და კოვიდრეგულაციების ნაწილი.
ჩვენ ვნახეთ, რომ გუშინ ბევრი რეგულაცია დაირღვა და ახლა ხელისუფლების პირდაპირი პასუხისმგებლობაა, დაამტკიცოს, რომ სხვა კანონები არ დარღვეულა.
უფრო სწორედ, ამ ხალხის გარდა, ხელისუფლება ვალდებულია დაამტკიცოს, რომ თავად არ დაურღვევია კანონი ამ ხალხის საქართველოში შემოყვანა-დახვედრა-გაცილებით,“- განაცხადა საბა ბუაძემ.
