საქართველოს უსაფრთხოების პოლიტიკის ინსტიტუტმა (GISP) რუსეთის ოკუპაციასთან დაკავშირებული ილუსტრაციების კონკურსი „რუსეთის ოკუპაცია 1921 წლიდან დღემდე“ გამოაცხადა. ამის შესახებ „ინტერპრესნიუსს“ ორგანიზატორებმა აცნობეს.

მათი ინფორმაციით, კონკურსი საბჭოთა ოკუპაციის 100 წლისთავს ემთხვევა.

მათივე ინფორმაციით, კონკურსის თემა მოიცავს 1921 წლიდან დაწყებულ მოვლენებს, რომელიც დღესაც გრძელდება, მცოცავი ოკუპაციის თუ ჰიბრიდული ომის სახით.

„ნამუშევრებში გადმოცემული უნდა იყოს, განსაკუთრებით, რუსული ოკუპაციის ემოციური ნაწილი. რა გავლენა იქონია რუსეთის ოკუპაციამ და მცოცავმა ანექსიამ ე.წ. საოკუპაციო ხაზის მახლობლად მცხოვრები ადამიანების ბედსა და ყოველდღიურ ცხოვრებაზე. როგორ შეცვალა 2008 წლის მოვლენებმა იმ ადამიანების ყოფა, ვინც იძულებით დატოვა საკუთარი სახლი და დევნილთა დასახლებებში განაგრძო ცხოვრება, როგორ იზრდება თაობები საკუთარი სახლებიდან შორს და ა.შ. კონკურსის შედეგად შეიქმნება ოკუპაციის თემაზე ორიგინალური, ადვილად აღსაქმელი და ინფორმაციული ილუსტრაციები. ილუსტრაციების კონკურსი: „რუსეთის ოკუპაცია 1921 წლიდან დღემდე“ 10 მაისს დასრულდება“, - აღნიშნულია ინფორმაციაში.