მედია - „ევროპის წამლის სააგენტომ“ „სინოვაკის“ უწყვეტი მიმოხილვის გადაწყვეტილება მიიღო, რომლის მიზანი მისი ეფექტურობის და უსაფრთხოების შეფასებაა
ევროკავშირის წამლის მარეგულირებელმა ორგანომ კორონავირუსის საწინააღმდეგო ჩინური ვაქცინის - „სინოვაკის“ უწყვეტი მიმოხილვის დაწყების შესახებ განაცხადა, რომლის მიზანია მისი ეფექტურობის და უსაფრთხოების შეფასება, რაც წარმოადგენს პირველ ნაბიჯს მისი ბლოკის წევრ ქვეყნებში გამოსაყენებლად შესაძლო დამტკიცების მიმართულებით. ამის შესახებ „ასოშიეითედ პრესი“ იუწყება.
ევროპის წამლის სააგენტომ დღეს განაცხადა, რომ მისი გადაწყვეტილება მიმოხილვის დაწყების თაობაზე დაფუძნებულია ლაბორატორიული და კლინიკური კვლევების წინასწარ შედეგებზე.
„ეს კვლევები აჩვენებს, რომ ვაქცინა იწვევს ანტისხეულების გამომუშავებას, რომლებიც ებრძვიან კორონავირუსს და შეუძლიათ ავადმყოფობისგან დაცვა“, - ნათქვამია სააგენტოს განცხადებაში.
ევროპის წამლის სააგენტო, რომელსაც ამ დროისთვის დამტკიცებული აქვს კორონავირუსის საწინააღმდეგო ოთხი ვაქცინა, დასძენს, რომ ჯერ კიდევ არ მიუღიათ განაცხადი „სინოვაკის“ ვაქცინის გაყიდვაზე ნებართვის მისაღებად.
