რუსთაველის  ფონდის მხარდაჭერით „საერთაშორისო საგაზაფხულო სკოლა „აფხაზეთი -  შუა საუკუნეებიდან დღემდე“ გაიხსნა

25-31 მაისს, შოთა რუსთაველის საქართველოს ეროვნული სამეცნიერო ფონდის საქართველოს ოკუპირებული ტერიტორიების შემსწავლელი სამეცნიერო კვლევითი პროექტების ხელშეწყობისა და საერთაშორისო სამეცნიერო ღონისძიებების საგრანტო კონკურსის გამარჯვებული პროექტის ფარგლებში „საერთაშორისო სეზონური (საგაზაფხულო) სკოლა „აფხაზეთი: შუა საუკუნეებიდან დღემდე (ისტორიულ-კულტუროლოგიური ასპექტები)“ იფუნქციონირებს.

რუსთაველის ფონდის ინფორმაციით, პროექტს ახორციელებს კორნელი კეკელიძის სახელობის საქართველოს ხელნაწერთა ეროვნული ცენტრი სოხუმის სახელმწიფო უნივერსიტეტთან თანამშრომლობით. ღონისძიება გახსნა ხელნაწერთა ეროვნული ცენტრის დირექტორმა, ისტორიის მეცნიერებათა დოქტორმა, ზაზა აბაშიძემ, რომელმაც აღნიშნა, რომ ამ პროექტით ცენტრმა შეძლო წვლილი შეეტანა ისეთ ეროვნულ საქმეში, როგორიცაა აფხაზეთის ისტორიის კვლევა - პოპულარიზაცია, ისტორიული სიმართლის დადგენა და მისი საერთაშორისო მასშტაბით გავრცელება, მადლობა გადაუხადა რუსთაველის სამეცნიერო ფონდს.

„რუსთაველის ეროვნული სამეცნიერო ფონდის გენერალურმა დირექტორმა, პროფესორმა ჯაბა სამუშიამ ოკუპირებული ტერიტორიების შემსწავლელი სამეცნიერო კვლევითი პროექტების ხელშეწყობისა და საერთაშორისო სამეცნიერო ღონისძიებების საგრანტო კონკურსის სახელმწიფოებრივ მნიშვნელობასა და მიზნებზე ისაუბრა, ყურადღება გაამახვილა იმ ფაქტზე, რომ კონკურსის მიმართ ინტერესი სულ უფრო იზრდება, წელს ორჯერ მეტი პროექტია შემოსული, ვიდრე წინა კონკურსზე: „ ეს არის კომპლექსური პროგრამა, უკვე მზადაა გამოსაცემად სოხუმის უნივერსიტეტის პროფესორის, ზურაბ პაპასკირის მასშტაბური ნაშრომი აფხაზეთის ისტორიაზე „აფხაზეთი საქართველოა“ ქართულ და ინგლისურ ენებზე, ივნისის მიწურულს იგეგმება დიდი საერთაშორისო კონფერენცია აფხაზეთში არსებული ქართული კულტურული მემკვიდრეობის ძეგლების მდგომარეობის შესახებ“. ღონისძიების მონაწილეებს სიტყვით მიმართა აფხაზეთის ავტონომიური რესპუბლიკის განათლებისა და კულტურის მინისტრმა, ეკა ხოფერიამ.

პროექტის „საერთაშორისო სეზონური (საგაზაფხულო) სკოლა „აფხაზეთი: შუა საუკუნეებიდან დღემდე (ისტორიულ-კულტუროლოგიური ასპექტები)“ მიზანია საქართველოს ოკუპირებული ტერიტორიის, მისი განუყოფელი ნაწილის - აფხაზეთის ავტონომიური რესპუბლიკის ისტორიის გააზრება შუა საუკუნებიდან დღემდე თანამედროვე სამეცნიერო სტანდარტებზე დაყრდნობით, სფეროში აკუმულირებული ცოდნის შეჯამება, აქტუალური საკითხების წინ წამოწევა აფხაზეთის ისტორიული და კულტუროლოგიური კვლევების სხვადასხვა მიმართულებების მიხედვით, სამომავლო კვლევითი პერსპექტივების დასახვა, თანამშრომლობითი ურთიერთობების განვითარება და ქართველ მეცნიერთა საერთაშორისო სამეცნიერო სივრცეში ინტეგრირება. პროექტის ხელმძღვანელია თეა ქართველიშვილი. სკოლის სამუშაო პროგრამა მოიცავს 5 სასწავლო მოდულს: ტერმინები „აფხაზი“ და „აფხაზეთი“; აფხაზეთი: „აფხაზთა სამეფოდან“ ოკუპირებულ ტერიტორიამდე; საეკლესიო პროცესები აფხაზეთში; აფხაზეთი: კულტურული მემკვიდრეობა; აფხაზეთი ხელნაწერთა ეროვნული ცენტრის კოლექციებში. საგაზაფხულო სკოლა განიხილება, როგორც პლატფორმა, რომელზედაც შესაძლებელია აფხაზეთის თემაზე კვლევის სხვადასხვა მიმართულებით საუკეთესო სამეცნიერო იდეების გენერირება მომავალი ერთობლივი ადგილობრივი და საერთაშორისო კვლევებისათვის“, - აღნიშნულია ინფორმაციაში.

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
აკადემიკოსი გიორგი ჯაფარიძე - ქვეყანა რომ წარმოდგენილი იყოს მსოფლიოს სამეცნიერო რუკაზე, აუცილებელია მასში მცხოვრები მეცნიერები თავისი საქმიანობით მონაწილეობდნენ საერთაშორისო სამეცნიერო პროცესში
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს