თბილისის საქალაქო სასამართლოში 20 ივნისის საქმესთან დაკავშირებით, "ნაციონალური მოძრაობის" თავმჯდომარის ნიკა მელიას ბრალდების საქმეზე პროცესი მიმდინარეობს.

დღევანდელი პროცესი ბრალდების მხარის მტკიცებულებებით გაგრძელდება, თვითონ ბრალდებული ნიკა მელია სხდომას არ ესწრება.

როგორც სხდომის დაწყებამდე საქმის ადვოკატმა გიორგი კონდახიშვილმა ჟურნალისტებს განუცხადა, დაცვის მხარისთვის უცნობია იმ მოწმეების ვინაობა, რომლებიც დღეს მელიას საქმესთან დაკავშირებით სასამართლოში ჩვენებას მისცემენ. ადვოკატის თქმით, მოწმეთა ვინაობის დამალვა პროკურატურის მხრიდან საკმაოდ უცნაური ფაქტია.

"სამწუხაროდ, მიუხედავად მოსამართლის მითითებისა, მიუხედავად შეთანხმებისა, რომ ამ ფორმატით უნდა გვემუშავა დღემდე, ცოცხალი თავით ბრალდების მხარე არ ამხელს იმ მოწმეების ვინაობას, რომელთა დაკითხვასაც ვაპირებთ დღევანდელ სასამართლო პროცესზე . ეს არის საკმაოდ უცნაური, ვერ აიხსნება ეს შიში, თუ რატომ არ უნდა გახდეს წინასაწარ ცნობილი მხარისთვის, რა ფორმატით ვმუშაობთ. დღეს გაგრძელდება პროცესი, ვნახავთ, ვინ მოწმეებს მოიყვანენ, ან რა ფორმატით გავაგრძელებთ მუშაობას. მე ამას ვხსნი იმით, რომ მოწმეების უმეტესობა ძალოვანი სტრუქტურის თანამშრომელია. ასევე, ზოგიერთი მოწმე არაძალოვანი სტრუქტურიდანაა, რომელიც ერთმნიშვნელოვნად იძლევა ცრუ ჩვენებებს ნიკა მელიას ბრალდების წინააღმდეგ. არ უნდათ, საჯარო გახდეს ამ მოწმეების ვინაობა და ასევე, ეშინიათ მოწმეების დისკრედიტირების", - აცხადებს კონდახაშვილი.