აფხაზეთის ავტონომიური რესპუბლიკის მთავრობის თავმჯდომარემ რუსლან აბაშიძემ აფხაზეთის ავტონომიური რესპუბლიკის უმაღლეს საბჭოში აფხაზეთის მთავრობის მიერ 2020 წელს გაწეული საქმიანობის ანგარიში წარადგინა.
აფხაზეთის ავტონომიური რესპუბლიკის მთავრობის ადმინისტრაციის ინფორმაციით, რუსლან აბაშიძემ აფხაზეთის მთავრობის პრიორიტეტულ მიმართულებებზე– განათლებაზე, ჯანდაცვასა და სოციალურ მიმართულებებზე ისაუბრა, რომელთა დაფინანსება აფხაზეთის ავტონომიური რესპუბლიკის ბიუჯეტიდან ხორციელდება. ყურადღება გაამახვილა იმ პროექტებზე, რომლებიც COVID-19 პანდემიის პირობებში დევნილი მოსახლეობის დასახმარებლად საერთაშორისო ორგანიზაციების მხარდაჭერით მიმდინარეობს.
აფხაზეთის ავტონომიური რესპუბლიკის მთავრობის ადმინისტრაციაში აცხადებენ, რომ 2020 წელს აფხაზეთის აღმასრულებელი ხელისუფლების დაწესებულებების საქმიანობის უმთავრეს მიზანს ტერიტორიული მთლიანობის აღდგენის ხელშეწყობისათვის აფხაზეთის საზოგადოების გაერთიანება, მოსახლეობაში სამშვიდობო ტენდენციების გაძლიერება და დევნილი საზოგადოების სოციალურ-ეკონომიკური მდგომარეობის გაუმჯობესება წარმოადგენდა.
შეხვედრის ფარგლებში აფხაზეთის მთავრობის თავმჯდომარემ აფხაზეთის წარმომადგენლობითი ორგანოს შეკითხვებს უპასუხა.