„ქართული ხმების“ სოლისტი ზურაბ ბაკურაძე რაჭაში უბედურ შემთხვევას ემსხვერპლა
„ქართული ხმების“ სოლისტი ზურაბ ბაკურაძე უბედური შემთხვევის შედეგად გარდაიცვალა. მისი ცხედარი სამაშველო სამსახურმა ცოტა ხნის წინ ხევიდან ამოიყვანა.
როგორც „ინტერპრესნიუსს“ საგანგებო სიტუაციების მართვის სამსახურში განუცხადეს, სამაშველო ჯგუფი ადგილზე შეტყობინებიდან მალევე მივიდა.
„მაშველების მიერ ხევიდან ამოყვანილია პირი, რომლის გარდაცვალების ფაქტი სასწრაფო-სამედიცინო დახმარების მხრიდან დაფიქსირდა“, - აცხადებენ საგანგებო სიტუაციების მართვის სამსახურში.
უბედური შემთხვევა რაჭაში მოხდა. სოფელ შქმერში გზა ჩავარდა, რა დროსაც ის ხევში გადავარდა.
ზურაბ ბაკურაძის ოჯახის ახლობლის, სალომე ადამიას განცხადებით, გავრცელებული ინფორმაცია, რომ ბაკურაძე უბედური შემთხვევის დროს რაჭაში, დედამისის დაკრძალვაზე იმყოფებოდა, სიმართლეს არ შეესაბამება.
„სამსახურის საქმეზე იყვნენ წასულები, მოწყდა მიწა და ჩაიტანა ხევში. ინფორმაცია, რომ დედის დაკრძალვაზე იყო, სრული დეზინფორმაციაა. დედის დაკრძალვა იყო ორი კვირის წინ", - განაცხადა სალომე ადამიამ.
