კომპანია „თაფლი ლეჩხუმიდან“ სოციალურ მეწარმეობას ავითარებს. ამის შესახებ ინფორმაციას "თიბისი" ავრცელებს.

"თიბისის" განმარტებით, კომპანია „თაფლი ლეჩხუმიდან“ Impact Hub Tbilisi- ს ერთ-ერთი გამარჯვებულია, რომელიც პროექტში თაფლის გადამამუშავებელი საწარმოს დაარსების იდეით მივიდა და პროექტის ფარგლებში დაგეგმილი ყველა ეტაპის გავლისა და გამარჯვების შემდეგ, იდეა რეალობად აქცია.

ამასთანავე, მათივე ინფორმაციით, Impact Hub Tbilisi- ს მიერ ორგანიზებული პროექტი Social Impact Award სოციალური მეწარმეობის მიმართულებით ყველაზე მასშტაბური სტუდენტური პროგრამაა, რომელიც 15 ქვეყანაში ერთობლივად ხორციელდება და სოციალური მეწარმეობის დარგში სტუდენტების განათლებაზეა ორიენტირებული. Social Impact Award -ის მეშვეობით „თიბისი ბიზნესი“ ახალგაზრდებსა და დამწყებ მეწარმეებს მხარს უჭერს, ასევე რეგიონებში მათ გაძლიერებას უწყობს ხელს.

„Impact Hub Tbilisi- მ პროგრამა Social Impact Award- ის განხორციელების ლიცენზია 2017 წელს მიიღო და უკვე მეხუთე წელია, ახალგაზრდებს აძლევს შესაძლებლობას, წამოიწყონ სოციალური ბიზნესი. ამ ხნის განმავლობაში პროგრამაში, საერთო ჯამში, საქართველოს სხვადასხვა რეგიონიდან 1000-ზე მეტი სტუდენტი ჩაერთო; შეირჩა 100-მდე ახალგაზრდა (30 გუნდი) და გამოვლინდა 14 გამარჯვებული გუნდი. ყველა პროექტი აქტუალურ სოციალურ პრობლემას ეხმაურება და მათი გადაჭრის ინოვაციურ გზებს გვთავაზობს. კომპანია „თაფლი ლეჩხუმიდან“ Impact Hub Tbilisi- ს ერთ-ერთი გამარჯვებულია, რომელიც პროექტში თაფლის გადამამუშავებელი საწარმოს დაარსების იდეით მივიდა და პროექტის ფარგლებში დაგეგმილი ყველა ეტაპის გავლისა და გამარჯვების შემდეგ, იდეა რეალობად აქცია“, - ნათქვამია ინფორმაციაში.

ლეჩხუმში, ოჯახში არსებული მეფუტკრეობის ტრადიციიდან გამომდინარე, ამ საქმის წინ წაწევისა და განვითარების სურვილი და-ძმას, გვანცა და გიგა ჭაბუკიანებს, დიდი ხანია ჰქონდათ, მცირე რაოდენობით თაფლს აწარმოებდნენ და ადგილობრივ ბაზარზე ჰყიდდნენ. „მეფუტკრეობა ჩვენი ოჯახური საქმეა. სწორედ ამის გამო ვთქვით მე და ჩემმა ძმამ უარი თბილისში სასწავლებლად წასვლაზე და უნივერსიტეტში ქუთაისში ჩავაბარეთ, რათა სახლთან შედარებით ახლოს ვყოფილიყავით და ფუტკრის მოვლისა და თაფლის წარმოების საშუალება გვქონოდა. პარასკევ საღამოს სახლში ვბრუნდებოდით ხოლმე, ორშაბათს კი ისევ ქუთაისში ვიყავით“, - განაცხადა გვანცა ჭაბუკიანმა.

Social Impact Award- ში მოხვედრამდე და-ძმა „თიბისი ბიზნესის“ მიერ შეთავაზებულ ვორქშოფებს ესწრებოდა, სადაც დაწვრილებით უხსნიდნენ, თუ რა იყო სოციალური მეწარმეობა. გვანცამ Social Impact Award -ის შესახებ მუნიციპალიტეტის ვებგვერდიდან შეიტყო და მაშინვე დაინტერესდა. მენტორთან სამთვიანი მუშაობის პროცესში, იდეა ბიზნეს გეგმად იქცა, შეიფუთა და ჟიურის წინაშე წარსდგა. გამარჯვებული პროექტი UNDP- მ, პირველ ეტაპზე, 2000 დოლარით, შემდეგ კი 7000 ლარით დააჯილდოვა. დღეს ლეჩხუმის თაფლის გადამამუშავებელი საწარმო მშენებლობის ბოლო ეტაპზეა.

„ჩვეულებრივი მეწარმისგან განსხვავებით, სოციალურ მეწარმეს, ეკონომიკურის გარდა, სოციალური მიზანიც აქვს: მეწარმე ცდილობს, სასიკეთო გავლენა მოახდინოს გარემოზე ან მოწყვლად ჯგუფზე,“ - ამბობს გვანცა ჭაბუკიანი.

"კომპანია „თაფლი ლეჩხუმიდან“ დამფუძნებლებმა უამრავი სასარგებლო ცოდნა მიიღეს – ბიზნეს გეგმის შედგენიდან დაწყებული კომპანიის ლოგოს შექმნის პრინციპებით დასრულებული. მათ სოციალურ საწარმოს ორი მიზანი აქვს, რომელიც, დამფუძნებლების გათვლით, საგრძნობლად შეცვლის მდგომარეობას რეგიონში და იქ მაცხოვრებლებს სიკეთეს მოუტანს. „მიუხედავად იმისა, რომ ლეჩხუმში მეფუტკრეობას ბევრი მისდევს და შესაბამისად, დიდი რაოდენობით თაფლი იწარმოება, რეგიონში არ არსებობს თაფლის გადამამუშავებელი საწარმო, რომელიც სურსათის ეროვნული სააგენტოს სტანდარტების მიხედვით შეძლებდა პროდუქტის გადამუშავებას. სწორედ ასეთი საწარმოს შექმნა გადავწყვიტეთ. გარდა ამისა, გვჯერა, რომ ჩვენი ბიზნესი მაგალითი იქნება და ადამიანები ადგილზე ბიზნესის წამოწყებას უფრო თავდაჯერებულად შეუდგებიან“, - განაცხადა გვანცა ჭაბუკიანმა. ლეჩხუმი მიგრაციის მაღალი მაჩვენებლით გამოირჩევა და მსგავსი წამოწყებები სასიცოცხლო მნიშვნელობისაა რეგიონისთვის. კომპანია "თაფლი ლეჩხუმიდან" არა მხოლოდ ადგილობრივი ბიზნესის ერთ-ერთი წარმატებული და სანიმუშო მაგალითია, არამედ სოციალური პასუხისმგებლობის გააზრების მაგალითიც არის. გვანცა საკუთარ ცოდნასა და გამოცდილებას ადგილობრივ ბავშვებს გადასცემს. გარდა ამისა, თაფლის გადამამუშავებელი საწარმო, რომლის გამართვაც მალე დასრულდება, მთელ რეგიონს მოემსახურება – ლეჩხუმელ მეფუტკრეებს შეეძლებათ, თავიანთი პროდუქცია გადასამუშავებლად ამ საწარმოში მიიტანონ. ამჟამად კომპანიას 70 ოჯახი ფუტკარი ჰყავს და 3 ტონამდე თაფლს აწარმოებს, რომელსაც საქართველოს ფარგლებს გარეთაც ყიდის – „თაფლი ლეჩხუმიდან“ თავის პროდუქციას უკვე გერმანიაში, საბერძნეთში, დუბაისა და რუსეთში აგზავნის. რამდენიმე სახის თაფლისა და ფუტკრის რძის წარმოების გარდა, კომპანიას დედა ფუტკარიც გამოჰყავს, რომელზე მოთხოვნაც ქვეყნის სხვადასხვა რეგიონში ძალზე მაღალია. კომპანიას დიდი სამომავლო გეგმები აქვს: ფუტკრის ოჯახების რაოდენობის და შესაბამისად, პროდუქციის წარმოების გაზრდის გარდა, „თაფლი ლეჩხუმში“ ადგილობრივების დასაქმებასაც აპირებს. თაფლის გადამამუშავებელი საწარმოს ამუშავების შემდეგ კი პროდუქციის, მთელი საქართველოს მასშტაბით, სავაჭრო ობიექტებსა და საოჯახო ტიპის სასტუმროებში შეტანაა განზრახული,"- ნათქვამია "თიბისის" ინფორმაციაში.