ნათია თურნავა - 61 მოიჯარეს საკუთრებაში გადაეცემა 240 ჰა სასოფლო-სამეურნეო მიწა და ეს პროცესი ეტაპობრივად გაგრძელდება

სასოფლო-სამეურნეო დანიშნულების მიწის რესურსზე ხელმისაწვდომობის სახელმწიფო პროგრამის" ფარგლებში 61 მოიჯარეს მიწის ნაკვეთები საკუთრებაში გადაეცემათ, - ამ გადაწყვეტილების შესახებ მთავრობის სხდომის დასრულების შემდეგ ეკონომიკისა და მდგრადი განვითარების მინისტრმა, ნათია თურნავამ ბრიფინგზე განაცხადა.

მინისტრის თქმით, პროგრამის ფარგლებში, სხვა დანარჩენ მოიჯარეებსაც, საქართველოს მასშტაბით, ეტაპობრივად გადაეცემათ იჯარით აღებული სასოფლო-სამეურნეო დანიშნულების მიწის ნაკვეთები.

„ჩვენ გასულ წელს დავამტკიცეთ ეს სპეციალური პროგრამა, რომელიც გულისხმობს სასოფლო-სამეურნეო დანიშნულების მიწის რესურსზე მეტ ხელმისაწვდომობას, როდესაც ფერმერებს, რომლებიც გრძელვადიანი იჯარით ფლობდნენ სასოფლო-სამეურნეო სავარგულებს, მიეცათ საშუალება, გამოისყიდონ მიწები და ეტაპობრივად გამოგვაქვს მთავრობაზე ეს გადაწყვეტილებები. დღეს დავამტკიცეთ განკარგულება 61 მოიჯარესთვის მათ მიერ იჯარით აღებული მიწების გამოსყიდვის თაობაზე, რაც ნიშნავს, რომ 61 მცირე და საშუალო ფერმერი საკუთრებაში მიიღებს დაახლოებით 240 ჰა მიწას, რომელიც შედარებით მცირე ნაკვეთებად იყო დაყოფილი", - აღნიშნა ეკონომიკის მინისტრმა.

ნათია თურნავას განმარტებით, პროგრამა ძალიან მნიშვნელოვანია, რადგან, მოიჯარეები შეძლებენ უკვე საკუთრებაში არსებული ქონებით ისარგებლონ და მიიღონ საბანკო დაფინანსება, ასევე მონაწილეობა მიიღონ მხარდაჭერის სახელმწიფო პროგრამებში და გამოიყენონ ქონება უფრო საინვესტიციო რესურსად. „რა თქმა უნდა, ეს ძალიან მნიშვნელოვანი გადაწყვეტილებაა, პროგრამა გაგრძელდება და ჩვენ ეტაპობრივად ყველაფერს გავაკეთებთ იმისთვის, რომ სასოფლო-სამეურნეო მიწა უფრო ეფექტურად იყოს დამუშავებული და განმტკიცდეს მიწაზე კერძო საკუთრება",- აღნიშნა მინისტრმა.

ეკონომიკისა და მდგრადი განვითარების სამინისტროს ინფორმაციით, სასოფლო-სამეურნეო დანიშნულების მიწის რესურსზე ხელმისაწვდომობის სახელმწიფო პროგრამა 2020 წელს საქართველოს მთავრობის შესაბამისი დადგენილებით დამტკიცდა. პროგრამა შემდგომში კიდევ უფრო გაფართოვდა და მასში რამდენიმე მნიშვნელოვანი ცვლილება განხორციელდა. მათივე ცნობით, პროგრამა გულისხმობს იჯარით გაცემული, დაახლოებით, 11 000 ჰა მიწის მოიჯარეებისთვის პირდაპირ მიყიდვას 25 პროცენტიანი ფასდაკლებით - ნაკვეთების საბაზრო ღირებულების მხოლოდ 75 პროცენტის გადახდის სანაცვლოდ. საუბარია იჯარით გაცემულ „სახნავი" და „სათიბი" კატეგორიის მიწის ნაკვეთებზე, რომელთა ჯამური ღირებულებაც ათეულობით მილიონი ლარია. პროგრამის მიხედვით, მოიჯარეებს შეუძლიათ სახელმწიფოსგან გამოისყიდონ 2021 წლის 31 მარტის მდგომარეობით იჯარით გაცემული სახნავი და სათიბი მიწის ნაკვეთები.

ბაკურ კვაშილავა - 19 აპრილის შეთანხმებიდან მმართველი გუნდის გამოსვლა არ ნიშნავს იმას, რომ იგი არ არსებობს - თუ მათ ხმების 43% ვერ მიიღეს, „ქართულ ოცნებას“ მოუწევს ვადამდელი არჩევნების დანიშვნა
ქართული პრესის მიმოხილვა 02.08.2021
ისრაელის ელჩი - საქართველოს ყველა მეგობრისთვის 5 ივლისის მოვლენები აბსოლუტურად შოკისმომგვრელი იყო
ვიქტორ ყიფიანი - მოქმედება თუ უმოქმედობა: ასარჩევი აი ეს არის
ურთიერთთანამშრომლობის მემორანდუმი კავკასიის უნივერსიტეტს და ქეჯის ბიზნესის სკოლას შორის
"თიბისის" აპლიკაციების კონკურსი იწყება
კავკასიის უნივერსიტეტის და ნიუ ჯერსის უნივერსიტეტის ერთობლივი ორმაგი ხარისხის პროგრამა