პარლამენტის ადამიანის უფლებათა დაცვისა და სამოქალაქო ინტერგრაციის კომიტეტის თავმჯდომარის მიხეილ სარჯველაძის განცხადებით, თბილისის მერის კახა კალაძის პასუხი ესტონეთის პრეზიდენტის განცხადებაზე არადიპლომატიური არ იყო.

როგორც მან ჟურნალისტებს განუცხადა, ის კოლეგას გაკეთებული განცხადებით გამო ვერ გაკიცხავს.

„მე არ მგონია, რომ კახა კალაძის განცხადებაში რაიმე იყოს არადიპლომატიური. რეალურად საქართველოს აქვს საკმაოდ დიდი პროგრესი, მნიშვნელვოანი და სტაბილური ამ მიმართულებით. გვაქვს საფუძველი ვთქვათ, რომ მომავალში ეს გაგრძელდება აუცილებლად და ამ ინტეგრაციის პროცესს არაფერი შეაფერხებს. აქედან გამომდინარე, ვფიქრობთ, რომ ეს მოსაზრება აბსოლუტურად რელევანტური იყო. მე არ მგონია, რომ საქართველოს ამ შემთხვევაში ვინმესგან სასაყვედურო ჰქონდეს, ამ შეფასებას ვერ გავკიცხავ“,- განაცხადა სარჯველაძემ.

ცნობისთვის, ესტონეთის პრეზიდენტი კერსტი კალიულაიდი მიიჩნევს, რომ საქართველოს, უკრაინასა და მოლდოვას, შესაძლოა 20-წლიანი მუშაობა დასჭირდეთ ევროკავშირში გაწევრიანების მზაობის მისაღწევად. როგორც პრეზიდენტი აცხადებს, პირადად ის ევროკავშირის გაფართოების მომხრეა, თუმცა ამას დიდი დრო სჭირდება. ესტონეთის პრეზიდენტის განცხადებას თბილისის მერმა კახა კალაძემ უპასუხა აღნიშნა, რომ „ყველამ თავის ქვეყანას მიხედოს“. როგორც კალაძემ თქვა, საქართველო შეძლებს, რომ ევროკავშირის წევრი რაც შეიძლება მალე გახდეს.