პარლამენტის თავმჯდომარის კახა კუჭავას განცხადებით, სექტემბრის თვეში დაგეგმილი და ამის გარდა, განრიგით გათვალისწინებული, ჯამში 7 მინისტრის მოსმენა, არჩევნების შემდგომ სასესიო სხდომებზე გაიმართება.

როგორც მან ბიუროს სხდომაზე განაცხადა, დეპუტატებს ინტენსიური მუშაობა მოუწევთ 2022 წლის ბიუჯეტის პროექტზეც.

„ამ თვეში დაგეგმილი იყო საგარეო საქმეთა მინისტრის და იუსიტიციის მინისტრის მოსმენები. რადგან სხდომები არ ჩატარდება, ჩვენ ამას გადავიტანთ. შემდეგ სასესიო სხდომებზე ჩვენ ალბათ ზოგი კვირა მოგვიწევს ორ-ორი მინისტრის მოსმენაც, რომ ამ წელს მოვასწროთ, განრიგით გათვალისწინებული, დაახლოებით 7 მინისტრის მოსმენა. ასევე, მოგვიწევს ინტენსიურად მუშაობა, რადგან პაუზა გვექნება, ბიუჯეტზეც, რომელიც წლის ბოლომდე იქნება მისაღები“, -აღნიშნა კუჭავამ.