„ქართულ ოცნებას“ აქვს განსხვავებული პოზიცია გენერალური პროკურორის არჩევისათვის საჭირო ხმების რაოდენობასთან მიმართებაში, ჩვენ უნდა ვიმსჯელოთ და საბოლოო გადაწყვეტილება მივიღოთ ხვალამდე, - ამის შესახებ „ლელო საქართველოსთვის“ ერთ-ერთმა ლიდერმა ბადრი ჯაფარიძემ უმრავლესობისა და საპარლამენტო ოპოზიციის სამუშაო შეხვედრის დასრულების შემდეგ განაცხადა.
ჯაფარიძის ინფორმაციით, გენერალურ პროკურორთან დაკავშირებით ცვლილებები მოდერატორების მხრიდან იყო შემოთავაზებული და მმართველ პარტიას არ შეუძლია მხოლოდ თვითონ აირჩიოს გენერალური პროკურორი, თუმცა, „ქართული ოცნების" პოზიციაა, რომ გენპროკურორის არჩევის ასეთი პრაქტიკა სხვა ქვეყნებში არ არის.
,,ამ მომენტისთვის, გვაქვს თანხმობა, რომ ყველა ფრაქცია მხარს ვუჭერთ ყველა შემდგომი არჩევნების პროპორციული წესით ჩატარების ჩანაწერს, დაბალ ბარიერს და ფრაქციის შექმნისთვის საჭირო წევრების შემცირებას შვიდიდან ოთხამდე. „ქართულ ოცნებას“ აქვს განსხვავებული პოზიცია გენერალური პროკურორის არჩევისათვის საჭირო ხმების რაოდენობასთან მიმართებაში, მათ ეს პოზიცია გაგვაცნეს, ჩვენ უნდა ვიმსჯელოთ და საბოლოო გადაწყვეტილება მივიღოთ ხვალამდე. გენერალური პროკურორის საკითხი იქნება ამოღებული და ცალკე ვუყრით კენჭს თუ დავტოვებთ ისე, როგორც არის. ამოცანაა, რომ კონსენსუსი მიღწეული იყოს, სხვაგვარად საჭირო მხარდაჭერას საკონსტიტუციო ცვლილებები ვერ მიიღებს. გენერალურ პროკურორთან დაკავშირებით ცვლილებები შემოთავაზებული იყო ჩვენი მოდერატორების მხრიდან სწორედ იმიტომ, რომ ეს საჭიროებს კონსენსუსს, მმართველ პარტიას არ შეუძლია მხოლოდ თვითონ აირჩიოს გენერალური პროკურორი. „ქართული ოცნების" პოზიციაა, რომ ასეთი პრაქტიკა სხვა ქვეყნებში არ არის, ამიტომ საბოლოოდ ისეთ ვერსიას უნდა ვუყაროთ კენჭი, რომელსაც ყველა დავუჭერთ მხარს და ექნება საკმარისი ხმები“, - აღნიშნა ბადრი ჯაფარიძემ.