უკრაინაში საქართველოს ელჩი არ არის დაბარებული საგარეო საქმეთა სამინისტროში, - ამის შესახებ “ინტერპრესნიუსს“ საქართველოს საგარეო უწყებაში განუცხადეს.

საგარეო საქმეთა სამინისტროს ინფორმაციით, უწყებაში შეხვედრას გამართავს საელჩოს დიპლომატი.

„უწყებაში შეხვედრას გამართავს საელჩოს დიპლომატი, რომელიც დადგენილი წესის თანახმად გაუცვლის ინფორმაციას უკრაინის მხარეს მიხეილ სააკაშვილის დაკავებასთან დაკავშირებით, რომელიც გახლავთ უკრაინის მოქალაქე”, - აცხადებენ უწყებაში.

ცნობისთვის, უკრაინული მედიის ინფორმაციით, უკრაინის საგარეო საქმეთა სამინისტროს პრესსპიკერმა ოლეგ ნიკოლენკომ განაცხადა, რომ უკრაინაში საქართველოს ელჩი ქვეყნის საგარეო საქმეთა სამინისტროში დაიბარეს, რაც საქართველოს მესამე პრეზიდენტის, უკრაინის მოქალაქის მიხეილ სააკაშვილის დაკავებასთან არის დაკავშირებული.