შს მინისტრის მოადგილე საკრებულოში განთავსებული აპარატურის შესახებ კითხვაზე - სურათს მაჩვენებთ, რომელიც ცხოვრებაში არ მინახავს
არ ვიცი, სურათს მაჩვენებთ, რომელიც ცხოვრებაში არ მინახავს, - ასე პასუხობს შს მინისტრის მოადგილე ალექსანდრე დარახველიძე ჟურნალისტს, რომელმაც საკრებულოს შენობაში ნაპოვნი მოწყობილობის მსგავსი ფოტო და ანოტაცია აჩვენა, სადაც ნათქვამია, რომ მოწყობილობას შეუძლია სიგნალის ჩახშობა.
მინისტრის მოადგილის განმარტებით, მოწყობილობა რეალურად პოლიციელებს შორის კავშირგაბმულობისთვის გამოიყენება და ამაზე კითხვები არ უნდა არსებობდეს.
"როგორც სამინისტროს განცხადებაში წავიკითხეთ, ეს იყო პოლიციელებს შორის კავშირგაბმულობის სისტემის უზრუნველსაყოფად გამოყენებული სპეციალური აპარატურა, რომელიც მიზანს ისახავს, რომ პოლიციელებს შორის კავშირში არ იყოს შეფერხებები, სწორედ ამისთვის იყო მიტანილი იქ ეს აპარატურა, შესაბამისად, კითხვები არ უნდა არსებობდეს,"- განაცხადა დარახველიძემ.
