შინაგან საქმეთა სამინისტროს გამომძიებლებისთვის, ამერიკის შეერთებული შტატების ნარკოტიკებთან ბრძოლის ადმინისტრაციის (DEA) და ნარკოტიკების წინააღმდეგ ბრძოლისა და სამართალდამცავ ორგანოებთან თანამშრომლობის საერთაშორისო ბიუროს (INL) ორგანიზებით, ნარკოდანაშაულის გამოძიების საკითხებზე სასწავლო კურსი ჩატარდა.

შსს-ს ინფორმაციით, ტრენინგის დახურვის ღონისძიებას შინაგან საქმეთა მინისტრის პირველი მოადგილე შალვა ბედოიძე და აშშ-ის ელჩი საქართველოში კელი დეგნანი დაესწრნენ. კურსდამთავრებულებს მინისტრის პირველმა მოადგილემ და აშშ-ის ელჩმა შესაბამისი სერტიფიკატები გადასცეს.

„შინაგან საქმეთა მინისტრის პირველმა მოადგილემ ამერიკის შეერთებული შტატების ელჩს წლების განმავლობაში არსებული მჭიდრო თანამშრომლობისა და გაწეული დახმარებისთვის მადლობა გადაუხადა. აშშ-ის ელჩმა ხაზი გაუსვა ნარკოდანაშაულის გამოძიების კუთხით სამართალდამცველთა გადამზადებისა და საერთაშორისო გამოცდილების გაზიარების მნიშვნელობას.

კურსის განმავლობაში მსმენელებმა ინფორმაცია მიიღეს ისეთ მნიშვნელოვანი საკითხებზე როგორიცაა: ნარკოტიკული საშუალებების ამოცნობის, ფარული საგამოძიებო მოქმედებების, უსაფრთხოების ძირითადი წესები ფარული ნარკოლაბორატორიების გამოკვლევის დროს და ფინანსური გამოძიების შესახებ“, - ნათქვამია უწყების მიერ გავრცელებულ ინფორმაციაში.