ევროკავშირის უმაღლესი წარმომადგენელი, საგარეო საქმეთა და უსაფრთხოების პოლიტიკის საკითხებში ჯოზეფ ბორელი აცხადებს, რომ ევროპას საფრთხე ემუქრება და აუცილებელია ევროპის სწრაფი რეაგირების ძალების 2025 წლამდე შექმნა.

მისი თქმით, ევროპელები საფრთხეს ყოველთვის სათანადოდ ვერ აფასებენ და გაერთიანებას უფრო რთული გამოწვევებისთვის მოუწევს წინააღმდეგობის გაწევა.

„ჩვენ ვართ სამყაროში, სადაც ყველაფერი მიდრეკილია აგრესიის იარაღად გამოყენებისთვის და ამ დროს ევროკავშირისთვის საკმარისი არ არის გამოიყენოს თავისი „რბილი ძალა“. არავის სურს ევროპული ნატოს შექმნა, მას ალტერნატივა არ აქვს“, - განაცხადა ბორელმა.

მან ასევე აღნიშნა, რომ მუშაობა დაასრულა „სტრატეგიული კომპასის“ დოკუმენტზე, რომელიც გაერთიანების საერთო საფრთხეების მიმართ ერთიანი პოზიციის შექმნაზეა მიმართული.

ევროკავშირის უმაღლესი წარმომადგენელის თქმით, აუცილებელია სწრაფი რეაგირების ძალების შექმნა, სადაც 5 000-მდე ჯარისკაცი იქნება.