პურის მწარმოებლები ფასს ჯერჯერობით ვერ შეცვლიან, ფასების მხრივ გარკვეული სტაბილიზაციაა და ალბათ, ახალ წლამდე ასე იქნება, - ამის შესახებ „პურის მცხობელთა ასოციაციის" თავმჯდომარე, მალხაზ დოლიძემ განაცხადა.

ამასთან, დოლიძე იმედოვნებს, რომ ხორბლის ახალი მოსავლის აღებამდე, გაზაფხულამდე, პურის ფასი შენარჩუნდება.

„დღესდღეობით პურის ფასი არ შეიცვლება და ალბათ ახალ წლამდე იქნება ის, რაც არის. მაგრამ გარკვეული პრობლემები შეიქმნა ხორბლის ფასთან დაკავშირებით, მსოფლიო ბაზარზე ხორბლის ფასმა ძალიან მოიმატა. რუსეთის სოფლის მეურნეობის მინისტრმა ისეთი ციფრი „დააბრახუნა“ - 400 დოლარამდე ავა 1 ტონა ხორბლის ღირებულებაო. მსოფლიო ბირჟებზე 1 ტონა ხორბლის ღირებულება 315-320 დოლარია“, - განაცხადა მალხაზ დოლიძემ მედიაჰოლდინგ „კვირას“ პრესკლუბში.