უკრაინის სახელმწიფო იცავს თავისი მოქალაქის ინტერესებს მსოფლიოს ნებისმიერ წერტილში და ამისთვის ყველა ბერკეტს იყენებს, შესაბამისად, მიხეილ სააკაშვილის წამებაზე და გაურკვეველი ფსიქოტროპული წამლების მიღებაზე საქმე უკვე აღძრულია და მიმდინარეობს გამოძიება, - ამის შესახებ მიხეილ სააკაშვილის უკრაინელმა ადვოკატმა ვლადისლავ გრიშენკომ რუსთავის მეთორმეტე პენიტენციურ დაწესებულებაში საქართველოს მესამე პრეზიდენტის მონახულების შემდეგ განაცხადა.

ადვოკატის შეფასებით, ინსპექტორის სამსახურის გაუქმება სააკაშვილის საქმესთან პირდაპირ კავშირშია და უკრაინისთვის მნიშვნელოვან სიგნალს წარმოადგენს.

,,სააკაშვილმა გადმოგვცა განცხადება მისი დაზარალებულად ცნობის თაობაზე და მხარე რომელიც დაზარალებულს წარმოადგენს აქტიურად განახორციელებს შესაბამის საგამოძიებო მოქმედებებს. ჩვენ გავოცდით როდესაც გავიგეთ,რომ საქალაქო სასამართლომ გააუქმა ინსპექტორის სამსახურის გადაწყვეტილება, ეს ნიშნავს იმას, რომ დამოუკიდებელი უწყება დაიშალა და ეს არის მნიშვნელოვანი სიგნალი უკრაინისთვის”, - აღნიშნა ადვოკატმა.