ვინაიდან რაფაელ მურსაკულოვს ბრალი ყაჩაღობითაც აქვს წაყენებული და მან ეს დანაშაული აღიარა, გამოდის, მოტივიც ეს იყო, - ამის შესახებ ავსტრალიის მოქალაქის, შანაი ბრუკის მკვლელობაში ბრალდებულის, რაფაელ მურსაკულოვის ადვოკატმა, სოფიო გოგლიჩიძემ განაცხადა.
როგორც ის განმარტავს, მურსაკულოვი შეღავათებს არ ითხოვს და ის ჩადენილ დანაშაულს ინანიებს.
„ბრალდებული აღიარებს დანაშაულს, ინანიებს, დღეს მან დასკვნითი სიტყვით ისარგებლა. ძალიან მძიმეა მისთვის ამ ყველაფრის გააზრება, ყველას ბოდიში მოუხადა თუკი, ვინმესთან შემხებლობა ჰქონია, ოჯახსაც, საზოგადოებასაც. ბრალდებულს აღქმა არ შეუძლია, რატომ მოხდა ეს, მას გარკვეული ფსიქიკური პრობლემები აქვს, რაც მის შერაცხადობას არ გამორიცხავს. აქედან გამომდინარე შეიძლება აიხსნას, თუ რა მოხდა იმ დღეს და რატომ ვერ გაიაზრა მან ეს. როცა დაფიქრდა და გაიაზრა რაც მოხდა, გულწრფელად მოინანია. ის გაგებას არავის სთხოვს და ელოდება ისეთ გადაწყვეტილებას, რასაც სასამართლო მიიღებს. თვითონაც ვერ აღწერს ეს ყველაფერი რამ გამოიწვია. ვინაიდან ბრალი ყაჩაღობითაც აქვს წაყენებული და მან აღიარა ეს დანაშაული, გამოდის, მოტივიც ეს იყო",- განაცხადა გოგლიჩიძემ.