ევროკავშირში ყველა არ აღფრთოვანდა უკრაინის გაწევრიანების იდეით, მაგრამ კიევი სისტემურ ზეწოლას განახორციელებს ყველა ფრონტზე. ამის შესახებ უკრაინის საგარეო საქმეთა მინისტრმა დმიტრო კულებამ ტელეკომპანია „რადას“ ეთერში განაცხადა.

„ჩვენ ახლა ამაზე ვმუშაობთ. ჯერ კიდევ რამდენიმე დღის წინ შეუძლებელი იყო უკრაინის ევროკავშირის წევრობაზე წარმოდგენაც კი. ახლა ჩვენ ახალ რეალობაში ვართ. უკრაინა ერთმნიშვნელოვნად იქნება ევროკავშირის წევრი“, - განაცხადა კულებამ.

მისი თქმით, ახლა ევროპელებმა სწორად უნდა წარმართონ პროცესები.

„ვერ ვიტყვი, რომ ყველა აღფრთოვანებულია ევროკავშირში ამ იდეით, რადგან იყვნენ მრავალწლიანი სკეპტიკოსები, მაგრამ ჩვენ ყველა ფრონტზე ვაწვებით. ვიცით ვისთან ვიმუშავოთ იმისთვის, რომ მაქსიმალურად დავაჩქაროთ ეს პროცესი“ , - განაცხადა კულებამ.