აზერბაიჯანმა რუსეთის დუმის დეპუტატი, მიხაილ დელიაგინი საერთაშორისო ძებნაში გამოაცხადა. აღნიშნულ ინფორმაციას აზერბაიჯანული საინფორმაციო სააგენტო trend-ი გენერალურ პროკურატურაზე დაყრდნობით ავრცელებს.

აზერბაიჯანული მედიასაშუალების ინფორმაციით, გენერალურმა პროკურატურამ განაცხადა, რომ, „უწყებამ მედიაში დელიაგინის ბოლო დროინდელ გამოსვლასთან დაკავშირებით ჩაატარა გამოძიება“. აზერბაიჯანის გენერალური პროკურატურის ცნობით, რუსი დეპუტატის ქმედება „ორი ქვეყნის თანამშრომლობის პრინციპებს ეწინააღმდეგება“.

აზერბაიჯანის პროკურატურის ინფორმაციით, 28 მარტს, დელიაგინი „რასია 1-ის“ ეთერში რუსეთის ხელისუფლებას აზერბაიჯანის წინააღმდეგ ომის დაწყებისკენ მოუწოდა. უწყების ცნობით, მან ასევე აზერბაიჯანის სანავთობო ინფრასტრუქტურის გასანადგურებლად ბირთვული იარაღის შესაძლო გამოყენების შესახებ პროვოკაციული ინიციატივით გამოვიდა.

აღნიშნულთან დაკავშირებით, აზერბაიჯანის ხელისუფლებამ პარტნიორი ქვეყნების შესაბამის უწყებებს მიმართა, რათა დელიაგინის ამ ქვეყნების ტერიტორიაზე შესვლის შემთხვევაში მისი დაკავება და აზერბაიჯანის სამართალდამცავი უწყებისთვის გადაცემა უზრუნველყონ.