საქართველოს პრემიერ - მინისტრს ან აქვს მითითება ან თვითინიციატივა იმისა, საქართველოსა და უკრაინის ურთიერთობა რაც შეიძლება უფრო დააზიანოს, - აღნიშნული შეფასება ჟურნალისტებთან პარლამენტის ოპოზიციონერმა წევრმა გრიგოლ ვაშაძემ გააკეთა.

როგორც ვაშაძე აცხადებს, "თუ ეს აზრის ჩამოყალიბების უუნარობაა, ეს უბედურებაა, ხოლო თუ პრემიერი მართლა იმას გულისხმობდა რაც თქვა, სრული კოშმარია“.

“საერთოდ, წესად უნდა იყოს, რომ ამ ძალიან დაძაბულ დროს, როცა ყოველი სიტყვა ოქროს ფასად უნდა იყოს აწონილი და შემდეგ გახმოვანებული, ამ თემებზე საუბარი პრემიერ-მინისტრმა პროფესიონალებს მიანდოს, თორემ ერთი შეცდომა მეორეზე მოსდის და ისედაც დაძაბულ ურთიერთობებს კიდევ უფრო ძაბავს“, - განაცხადა გრიგოლ ვაშაძემ.

ცნობისთვის, პრემიერ - მინისტრის ირაკლი ღარიბაშვილის განცხადებით, ჯერ კიდევ 25 თებერვალს საუბრობდა, რომ თუ ვინმე დაიჩაგრებოდა და დაისჯებოდა ამ ომით, ეს უკრაინა იქნებოდა. მისივე თქმით, ამის შემჩერებელი არავინაა.