სახელმწიფო უსაფრთხოების სამსახურში, გორის მუნიციპალიტეტის მერიის კულტურისა და ტურიზმის სააგენტოს ბუღალტრის, ლეილა წკრიალაშვილის გამოკითხვა მიმდინარეობს.

,,ინტერპრესნიუსს" სუს-ში დაუდასტურეს ინფორმაცია, რომ სახელმწიფო უსაფრთხოების სამსახურში გორის კულტურისა და ტურიზმის სააგენტოს საქმიანობასთან დაკავშირებით გამოძიება მიმდინარეობს.

არსებული ინფორმაციით, საქმე ეხება გასული ორი წლის განმავლობაში სააგენტოს ფინანსურ საქმიანობას და განხორციელებულ გადარიცხვებს. როგორც ცნობილი გახდა, აღნიშნულ პერიოდში გადარიცხვები განხორციელდა აზარტული თამაშების ანგარიშებზე.

რაც შეეხება გორის კულტურის სააგენტოს ყოფილ დირექტორს, გელა კაპანაძე აცხადებს, რომ დღეს დილით აუდიტის სამსახურში გამოკითხვაზე იმყოფებოდა, სადაც კითხვები სწორედ აღნიშნულ გადარიცხვებს ეხებოდა.

,,აბსოლუტურად არანაირ ინფორმაციას არ ვფლობდი მსგავს გადარიცხვებზე, ჩემთვისაც ისეთივე მოულოდნელი იყო ეს ინფორმაცია და კითხვები, როგორც დანარჩენი საზოგადოებისთვის, სხვას ვერაფერს გეტყვით“, - განაცხადა გელა კაპანაძემ.

არსებული ინფორმაციით, საუბარია რამდენიმე ასეულ ათას ლარზე.

ცნობისთვის, გორის გორის კულტურისა და ტურიზმის სააგენტოს დაქვემდებარებულ კულტურის სახლში, სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა საგამოძიებო მოქმედებები მიმდინარე წლის თებერვალშიც ჩაატარეს, საქმე ეხებოდა კულტურულ-საგანმანათლებლო ცენტრში აღმოჩენილ ციფრული ვალუტის გამომუშავებისთვის უკანონოდ დამონტაჟებულ მაინერებს.