შეხვედრის დროს, სურვილი გამოვთქვით საქართველოში აშშ-ს სამხედრო ბაზის არსებობასთან დაკავშირებით, - ამის შესახებ „რესპუბლიკური პარტიის” თავმჯდომარემ, ხათუნა სამნიძემ განაცხადა, რომელიც ოფიციალური ვიზიტით ვაშინგტონში იმყოფება.
„რესპუბლიკური პარტიის“ ინფორმაციით, ვიზიტის ფარგლებში პარლამენტარმა შეხვედრები კონგრესმენ ადამ კინზინგერსა და კონგრესვუმენ კეტრინ რაისთან გამართა.
სამნიძის განცხადებით, კონგრესმენების მთავარ ინტერესს მიმდინარე პროცესებში საქართველოს პოზიციონირების საკითხი წარმოადგენს. ამასთან, განხილვის მთავარი თემა პოლარიზებასთან დაკავშირებული პრობლემები და ის რეფორმები იყო, რომლებზეც ქართულ მხარეს პასუხისმგებლობა აქვს აღებული.
„შეხვედრის დროს სურვილი გამოვთქვით საქართველოში აშშ-ს სამხედრო ბაზის არსებობასთან დაკავშირებით. ეს არის თემა, რომლის მიმართულებით ძალიან აქტიურად უნდა მუშაობდეს საქართველოს ხელისუფლება. ჩვენ ოპოზიცია, მაქსიმუმს გავაკეთებთ, რომ ეს საკითხები დღის წესრიგში იყოს, მაგრამ ძირითადი პასუხისმგებლობა, ტვირთი არის საქართველოს ხელისუფლებაზე. ხაზი გავუსვით 19 აპრილის შეთანხმების შესრულების აუცილებლობას, რომელშიც აღნიშნულია სასამართლო რეფორმები, საკონსტიტუციო ცვლილებები და სხვა ვალდებულებები, რომლებზე "ქართულ ოცნებას" უარი არ უთქვამს”, - განაცხადა ხათუნა სამნიძემ.