მადრიდის სამიტი ძალიან გადამწყვეტ დროს ჩატარდება და ფოკუსი იქნება იმ შედეგებსა და გავლენაზე, რომელიც უკრაინაზე რუსეთის ბრუტალურმა თავდასხმამ გამოიწვია, - ამის შესახებ საქართველოში ნატო–ს სამეკავშირეო ოფისის ხელმძღვანელმა ალექსანდრ ვინიკოვმა განაცხადა.

მისივე ინფორმაციით, ალიანსის წევრები მადრიდის სამიტზე მომავალი ათწლეულისთვის ნატო-ს სტრატეგიულ ხედვასაც განსაზღვრავენ. მან იმედი გამოთქვა, რომ საქართველოს წევრობის მისწრაფებები ასახული იქნება საბოლოო დოკუმენტში.

„რა თქმა უნდა, წინასწარ იმის განსაზღვრა არ შემიძლია რას გადაწყვეტენ მოკავშირეები და რა გზავნილებს გააკეთებენ. შემიძლია გითხრათ, რომ მადრიდის სამიტი ძალიან გადამწყვეტ დროს ჩატარდება და ფოკუსი იქნება იმ შედეგებსა და გავლენაზე, რომელიც უკრაინაზე რუსეთის ბრუტალურმა თავდასხმამ გამოიწვია, რაც საერთაშორისო კანონის ცხადი დარღვევაა. ფოკუსი იქნება შემდგომი სტრატეგიული კონცეფციის მიღებაზე, რომელიც ნატო-ს ერთ-ერთი ფუნდამენტური დოკუმენტია, რომელშიც ნატო-ს სტრატეგიული ხედვა მომავალი ათწლეულისთვის განისაზღვრება. და, რა თქმა უნდა, მე ველი, რომ საქართველოს წევრობის მისწრაფებები იქნება ასახული საბოლოო დოკუმენტში, რომელიც მიიღება“,- განაცხადა ალექსანდრ ვინიკოვმა.