გავლენიანი საერთაშორისო უფლებადამცველი არასამთავრობო ორგანიზაცია „ამნესთი ინთერნეიშენალი“ ღრმად შეშფოთებულია „მთავარი არხის“ გენერალური დირექტორის ნიკა გვარამიას საქმის უკან არსებული პოლიტიკური მოტივებით, რომელიც გამოხატვის თავისუფლების ჩახშობას ისახავს მიზნად.

„ნიკა გვარამიას წინააღმდეგ გამოტანილი განაჩენი მისი განსხვავებული შეხედულებებისა და ხელისუფლების კრიტიკის გამო, სამაგიეროს გადახდის მიზნით, პოლიტიკურად მოტივირებული დევნის აშკარა ქმედებაა. მას ახლა გისოსებს მიღმა წლების გატარება ემუქრება, რადგან მთავრობა განსხვავებული ხმების ჩასახშობად ძალისხმევას აძლიერებს. ნიკა გვარამია სასწრაფოდ უნდა გათავისუფლდეს“, - განაცხადა ორგანიზაციის აღმოსავლეთ ევროპისა და ცენტრალური აზიის ქვეყნების დირექტორმა მარია სტრუტერსმა.

„ამნესთი ინთერნეიშენალის“ განცხადებით, ნიკა გვარამიას დამნაშავედ ცნობა ხაზს უსვამს საქართველოში მედიის თავისუფლების გაუარესებასთან დაკავშირებით მზარდ შეშფოთებას და ავლენს ხელისუფლების მზარდ გავლენას სასამართლოებზე რიგ საქმეებში, რომლებიც მიზნად მათი კრიტიკოსებისა და ოპონენტების ჩახშობას ისახავს.