გიგა ბოკერია - მხოლოდ ივანიშვილის და მისი პოლიტიკური მასხარების გარემოცვის ჩამოცილებით შევძლებთ დეოლიგარქიზაციას

მხოლოდ ივანიშვილის და მისი პოლიტიკური მასხარების გარემოცვის ჩამოცილებით შევძლებთ დეოლიგარქიზაციას - ასეთი პროტესტების გრძელვადიანი და მაღალი ინტენსივობით დაგეგმვაა საჭირო, მშვიდობიანად რეჟიმის პარალიზება, თუმცა, ამას შეიძლება დაჭირდეს თვეები, - ამის შესახებ „ევროპული საქართველოს" ლიდერმა გიგა ბოკერიამ "ინტერპრესნიუსთან" აქციაზე განაცხადა.

მისი თქმით, საზოგადოებამ უნდა შექმნას წნეხი, რასაც ერთი და ორი აქცია არ ეყოფა.

„აქ არ არის ერთი აქციის მნიშვნელობაზე საუბარი, საუბარია იმის მნიშვნელობაზე, რომ ქართულმა საზოგადოებამ ნაბიჯ- ნაბიჯ მშვიდობიანად უნდა შექმნას ისეთი წნეხი და ამას ერთი და ორი აქცია არ ეყოფა, რომ ამ ავტორიტარულ რეჟიმს, რომელიც საფრთხეა ჩვენი ქვეყნის მომავლისა და თავისუფლებისთვის, სხვა გზა არ ჰქონდეს გარდა იმისა, რომ შეეგუოს ძალაუფლების მშვიდობიანად დათმობას. ეს აუცილებელი პირობაა, რომ გავაღწიოთ სამშვიდობოს.

ასეთი ავტორიტარული რეჟიმი რომ დისფუნქციური გახდეს, საჭიროა სუპერუმრავლესობა ხალხის. ამიტომ ყველა აქტიურმა სამოქალაქო და პოლიტიკურმა გუნდმა უნდა გააფართოოს თავის გარშემო რიცხვი იმ ადამიანების, ვინც მზად არის ადამიანური რესურსი დახარჯოს ამ პროტესტში",- განაცხადა ბოკერიამ.

ამასთან, ბოკერიას თქმით, საზოგადოებას არ უნდა ჰქონდეს მოლოდინი, რომ ქვეყნის შიგნით მის გასაკეთებელს დასავლეთი გააკეთებს, თუმცა, უნდა იცოდეს, რომ დასავლეთი მხარს უჭერს ხალხის არჩევანს.

„ის, რომ ივანიშვილმა და მისმა რეჟიმმა გადადგა ნაბიჯები, რითაც დისკუსია მის პერსონალურ და მისი გარემოცვის სანქცირებაზე გახადა უფრო აქტიური, ეს მოვლენების ბუნებრივი განვითარებაა. რა თქმა უნდა, ყველამ, ვისაც აქვს თავისუფალ სამყაროს ამ მიმართულებით ინფორმაციის მიწოდების შესაძლებლობა, უნდა მიაწოდოს, ჩვენც ამის მონაწილე ვიყავით და ვართ, ოღონდ გათვლა იმაზე არ უნდა იყოს, რომ იქ სანქციებს დაუწესებენ და ასე გადაწყდება პრობლემა აქ. როცა აქ ვითარება გვექნება მომწიფებული ამ რეჟიმის მშვიდობიანი დამარცხებისთვის, დასავლეთის პოზიციას ექნება დიდი მნიშვნელობა, რომ ნაკლები ზიანით გავისტუმროთ, რომ "ქართულმა ოცნებამ" მეტად არ დაგვაზიანოს და არ გარისკოს კიდევ უფრო დრაკონული რეპრესიული ნაბიჯების გადადგმა, ვიდრე აქამდე დგამდა. ეს აქცია არის მნიშვნელოვანი, მაგრამ არასაკმარისი, საკმარისი იქნება ასეთი პროტესტების გრძელვადიანი და მაღალი ინტენსივობით დაგეგმვა, მშვიდობიანად რეჟიმის პარალიზება, თუმცა, ამას შეიძლება დაჭირდეს თვეები",- განაცხადა ბოკერიამ.

თენგიზ ფხალაძე - რუსეთის ყველა უკანონო ნაბიჯი მოითხოვს რეაგირებას, მოსკოვმა უნდა გადაიხადოს პოლიტიკური ფასი საქართველოს წინააღმდეგ ჩადენილი ყველა დანაშაულისათვის, დუმილით კი ამას ვერ მივაღწევთ
ქართული პრესის მიმოხილვა 08.08.2022
კახა ოქრიაშვილი აგვისტოს ომის მე-14 წლისთავთან დაკავშირებით განცხადებას ავრცელებს