„ნაციონალური მოძრაობა“ „პოლიტიკურ ოფსაიდშია“ - ცდილობენ, შექმნან და ამომრჩევლებს შესთავაზონ გარკვეული დღის წესრიგი, რომელიც სინამდვილეში არ არსებობს, ან კრახისთვისაა განწირული,- ამის შესახებ პარლამენტის ვიცე-სპიკერმა არჩილ თალაკვაძემ ჟურნალისტებს განუცხადა, რითაც გამოეხმაურა ხატია დეკანოიძის განცხადებას, რომ “ბიძინა ივამიშვილისა და მისი გარემოცვის საქმიანობა და რუსეთთან კავშირი არის საფრთხე უკრაინისთვის და უკრაინის გამარჯვებისთვის”.

თალაკვაძის თქმით, აღნიშნული განცხადება ლოგიკას მოკლებულია და საქართველოსთვის დამაზიანებელია.

“ეს განცხადება ყოველგვარ ლოგიკას მოკლებულია და წარმოადგენს “ნაციონალური მოძრაობის” შიდა პოლიტიკური დღის წესრიგის ნაწილს. ეს გახლავთ საქართველოსთვის დამაზიანებელი, თუმცა “ნაციონალური მოძრაობისთვის” სულერთია, რა იქნება საქართველოსთვის სასარგებლო თუ საზიანო. მათ აინტერესებთ მხოლოდ და მხოლოდ თავიანთი ვიწროპოლიტიკური დღის წესრიგი, რომელიც ხშირად, განსაკუთრებით ბოლო წლების განმავლობაში, წინააღმდეგობაში მოდის ქვეყნის ინტერესებთან. გვჯერა, რომ საზოგადოება სათანადოდ აფასებს მათ განცხადებებსა და საქმიანობას. გაუგებარი და წარმოუდგენელია და არცერთ დემოკრატიულ ქვეყანაში არ ხდება ის, რომ პარლამენტში ოპოზიციური პოლიტიკური პარტია, რომელსაც ერთ-ერთი ყველაზე მეტი მანდატი აქვს, არ ერთვება ისეთი მნიშვნელოვანი საკითხის განხილვაში, როგორიცაა საკანონმდებლო ცვლილებები, რომელიც ევრორეკომენდაციებს უკავშირდება. ამით ყველაფერი ნათქვამია”,- განაცხადა არჩილ თალაკვაძემ.