საქართველოს დამოკიდებულება იქნება უკომპრომისო და ამას ვერც ერთ შემთხვევაში ვერ მივუდგებით შემწყნარებლურად, - ამის შესახებ უმრავლესობის ერთ-ერთმა ლიდერმა მიხეილ სარჯველაძემ ბელარუსის პრეზიდენტის ალექსანდრე ლუკაშენკოს აფხაზეთში ჩასვლასთან დაკავშირებით განაცხადა.

მისი თქმით, ეს ის პროცესია, სადაც ვერც ერთ შემთხვევაში, საქართველო პრინციპული პოზიციიდან უკან ვერ დაიხევს.

"საქართველოს დამოკიდებულება, რა თქმა უნდა, იქნება უკომპრომისო და ამას ვერც ერთ შემთხვევაში ვერ მივუდგებით შემწყნარებლურად. კონკრატულად რა ნაბიჯი რის შემდეგ იქნება, რა თქმა უნდა, წინასწარ თქმა გამიჭირდება, მაგრამ ერთი რამ შემიძლია ვთქვა, რომ ეს არის ის პროცესი, სადაც ვერც ერთ შემთხვევაში, ამ პრინციპული პოზიციიდან საქართველო უკან ვერ დაიხევს და რასაკვირველია, ვერავის მივცემთ საშუალებას უკან დაიხიოს სხვამაც, როდესაც საკითხი საქართველოს ტერიტორიულ მთლიანობას ეხება", - განაცხადა სარჯველაძემ.

როგორც მან აღნიშნა, მას არ ჰგონია საქმე ლუკაშენკოს მხრიდან აფხაზეთის აღიარებამდე მივიდეს.

„ნებისმიერი მიმართულებით შემდგომი ნაბიჯების გადადგმა ნებისმიერი სახელმწიფოს მხრიდან საქართველოს ტერიტორიული მთლიანობის ხარჯზე აბსოლუტურად მიუღებელია”,- განაცხადა სარჯველაძემ.

შეგახსენებთ, რომ ბელარუსის პრეზიდენტი ალექსანდრე ლუკაშენკო ოკუპირებულ აფხაზეთში ჩავიდა. ლუკაშენკო აფხაზეთის ე.წ. პრეზიდენტს ასლან ბჟანიას ბიჭვინთის აგარაკზე შეხვდა. შეხვედრაზე ლუკაშენკომ აღნიშნა, რომ რუსეთის პრეზიდენტთან, ვლადიმერ პუტინთან გუშინ გამართულ შეხვედრაზე აფხაზეთის საკითხი განიხილეს. მისი თქმით, აფხაზეთთან არა მხოლოდ „მეგობრობის ხიდის“ აშენება, არამედ ძალიან სერიოზული ურთიერთობები სურთ.