აშშ უკრაინისთვის NASAMS-ის ჰაერსაწინააღმდეგო სისტემების მიწოდებას დააჩქარებს. ამის შესახებ ეროვნული უსაფრთხოების სპიკერმა ჯონ კირბიმ განაცხადა.

კირბის თქმით, აშშ-მა უკვე დაიწყო NASAMS-ის პირველი ორი სისტემის მიწოდების პროცესი და იგი “უახლოეს მომავალში” დასრულდება.

მან ზუსტი თარიღები არ დაასახელა, თუმცა აღნიშნა, რომ აშშ “უდავოდ დაინტერესებულია” სისტემების მიწოდების დაჩქარებაში.

ინფორმაციისთვის, უკრაინისთვის NASAMS ჰაერსაწინააღმდეგო ორი სისტემის მიწოდების შესახებ შეერთებულმა შტატებმა ივლისის დასაწყისში დააანონსა. სექტემბერში კი პენტაგონში განაცხადეს, რომ პირველი ორი კომპლექსი უკრაინას მომდევნო ორი თვის განმავლობაში გადაეცემა.