სააპელაციო სასამართლოს, ისევე როგორც პირველი ინსტანციის სასამართლოს, ნიკა გვარამიას საქმეზე გადაწყვეტილება არ მიუღია, ისინი უბრალოდ აცხადებენ განაჩენს, რომელიც სხვაგან და უფრო ადრე დაიწერა, - ამის შესახებ ჟურნალისტებთან „ლელოს“ დეპუტატმა ანა ნაცვლიშვილმა განაცხადა, რითაც ნიკა გვარამიას საქმეზე სასამართლო გადაწყვეტილებას გამოეხმაურა.
მისივე თქმით, „ქართული ოცნების“ ამომრჩეველსაც კი არ სჯერა, რომ გადაწყვეტილება მოსამართლემ მიიღო.
„გვარამია იმ ბრალდებით, რასაც მას უყენებს პროკურატურა, არის უკანონო და პოლიტიკური მოტივით ციხეში ჩასმული. ასევე, ამ ქვეყნის მომავლისთვის, საქართველოს მოქალაქეებისთვის საფრთხეს და ზიანს წარმოადგენს არა ის, რასაც პროკურატურა ედავება გვარამიას, კერძო კომპანიისთვის მიყენებულ ზიანზე, არამედ საფრთხეს წარმოადგენს პოლიტიზებული პროკურატურა და სასამართლო იმ მდგომარეობაში, რომელშიც არის. არავის, მათ შორის „ქართული ოცნების“ მომხრეებსაც კი არ სჯერათ, რომ ეს არის მოსამართლეების მიერ გამოტანილი გადაწყვეტილება. ეს რომ 30 წლიანი რეფორმების და ამ ხელისუფლების პირობებში 4-ტალღიანი რეფორმის შემდეგ სასამართლოს დამოუკიდებლობის და მიუკერძოებლობის მიმართ არანაირი ნდობა არ არსებობს, ეს არის ძალიან მძიმე დარტყმა იმ ხელისუფლებისთვის, რომელიც სასამართლო რეფორმირების დაპირებით მოვიდა 2012 წელს ხელისუფლებში,“ - განაცხადა ნაცვლიშვილმა.
"მთავარი არხის" დამფუძნებელი ნიკა გვარამია თბილისის სააპელაციო სასამართლომაც დამნაშავედ ცნო. შესაბამისად, თბილისის საქალაქო სასამართლოს მიერ მისთვის 3 წლითა და 6 თვის ვადით შეფარდებული თავისუფლების აღკვეთა ძალაში დარჩა. ამასთან, სააპელაციო სასამართლომ ნიკა გვარამიას 6 მილიონ 700 000 ლარის გაფლანგვის ეპიზოდზე სამსახურებრივი უფლებამოსილების ბოროტად გამოყენებისთვის შეფარდებული 5 0000-ლარიანი ჯარიმა პატიმრობით შეუცვალა, თუმცა საბოლოოდ, მას საპატიმროში ყოფნა აქამდე განსაზღვრული 3 წლითა და 6 თვის ვადით მოუწევს. აღნიშნული გადაწყვეტილება თბილისის სააპელაციო სასამართლოს მოსამართლეთა კოლეგიამ მიიღო.