ზურაბ ბატიაშვილი - ყველა, ვინც თავს ცივილიზებული სამყაროს ნაწილად მიიჩნევს, რუსეთის ტერორისტულ სახელმწიფოდ აღიარებას უნდა შეუერთდეს

ყველა, ვინც თავს თვლის ცივილიზებული სამყაროს ნაწილად, უნდა შეუერთდეს რუსეთის ტერორისტულ სახელმწიფოდ აღიარებას. რთული სათქმელია, რას მოიმოქმედებს საქართველოს ხელისუფლება, რომელიც არც თუ ისე ცუდად განწყობილი არის რუსეთის მიმართ, - ამის შესახებ ანალიტიკოსმა ზურაბ ბატიაშვილმა „ინტერპრესნიუსთან“ საუბრისას განაცხადა, რითაც ის ევროპარლამენტის მიერ რუსეთის „ტერორიზმის სპონსორ სახელმწიფოდ“ გამოცხადებას გამოეხმაურა.

მისივე შეფასებით, ევროპარლამენტის აღნიშნული გადაწყვეტილება რუსეთის მიერ უკრაინის სამოქალაქო ინფრასტრუქტურაზე მუდმივ თავდასხმებს მოჰყვა.

„ეს ყველაფერი მოჰყვა რუსეთის მხრიდან უკრაინის გაუთავებელ დაბომბვებს - მხედველობაში მაქვს სამოქალაქო ინფრასტრუქტურაზე მიტანილი უწყვეტი შეტევები, რაც სწორედ ტერორიზმის მუხლში შედის. ცივილიზებული სამყაროში ეს არის წითელი ხაზი, რომლის გადაკვეთასაც არ პატიობენ. ისიც უნდა ითქვას, რომ აშშ-ზე წინ ევროპა წავიდა, რაც მისასალმებელია, განსაკუთრებით კი, რუსეთთან მიმართებით შეიცვალა გერმანიის მიდგომები. კარგი ის არის, რომ ამის შემდეგ რუსეთთან ურთიერთობებზე უფრო მეტი შესაძლებლობა იქნება იმისთვის, რომ მეტი სანქციები დაწესდეს მათთვის, ვინც რუსეთთან სანქციების გვერდის ავლით ჩართული არის ვაჭრობაში და ა.შ.

ყველა, ვინც თავს თვლის ცივილიზებული სამყაროს ნაწილად, უნდა შეუერთდეს ამას. რთული სათქმელია, რას მოიმოქმედებს საქართველოს ხელისუფლება, რომელიც არც თუ ისე ცუდადაა განწყობილი რუსეთის მიმართ. ჯერჯერობით რაც ვნახეთ, საქართველოს ხელისუფლება ამისგან მაქსიმალურად თავს იკავებს, მაგრამ ეს დიდ ხანს ვერ გაგრძელდება“, - განაცხადა ზურა ბატიაშვილმა.

ცნობისთვის, გუშინ, 23 ნოემბერს ევროპარლამენტმა რუსეთი „ტერორიზმის სპონსორ სახელმწიფოდ“ გამოაცხადა.

ევროდეპუტატების განცხადებით, რუსეთის მიერ განხორციელებული იერიშები სამოქალაქო ობიექტებზე, როგორიცაა ენერგეტიკული ინფრასტრუქტურა, საავადმყოფოები, სკოლები და თავშესაფრები, საერთაშორისო კანონს არღვევს.

ლევან შენგელია - მხოლოდ რუსეთის ფუნდამენტურმა დამარცხებამ უკრაინასთან და მთლიანად დასავლეთთან დაპირისპირებაში შეიძლება აგვაცილოს თავიდან ცუდი მომავალი
გრიგორი კუკურუზა - ომით მიყენებული ზარალი დაახლოებით 1,1-1,2 ტრილიონ აშშ დოლარს შეადგენს - უკრაინას იმედი აქვს, რომ ქვეყნის აღსადგენად სახსრებს აგრესორი რუსეთისგან მიიღებს
ქართული პრესის მიმოხილვა 28.11.2022
რეალური შავი პარასკევი „ჰუალინგ პლაზაში“ – გაიგეთ შეთავაზების დეტალები
„სმარტ კაპიტალმა“ ედიშერ და გიგი გარაყანიძეების სახელობის სტიპენდიატები დააჯილდოვა
პეტროკას ენერჯი ჯგუფი და სანპეტროლიუმ ჯორჯია განცხადებას ავრცელებენ