ევროკომისია, ელექტროენერგიის დაზოგვის მიზნით, უკრაინისთვის 30 მილიონამდე LED ნათურას დააფინანსებს, - ამის შესახებ ევროკომისიის პრეზიდენტის, ურსულა ფონ დერ ლაიენი „ტვიტერზე“ წერს.

„ჩვენ დავაფინანსებთ 30 მილიონამდე LED ნათურას უკრაინისთვის, ძვირფასი ენერგიის დაზოგვისთვის. როდესაც 50 მილიონი ასეთი ნათურა განლაგდება ჩვენს პარტნიორებთან, ეს დაზოგავს 1 გიგავატს - ატომური სადგურის წლიურ გამომუშავებას! სიბნელის დროს ჩვენ უკრაინელ მეგობრებთან ერთად ვდგავართ“, - წერს ურსულა ფონ დერ ლაიენი.

შეგახსენებთ, რუსეთი უკრაინის ენერგეტიკულ ინფრასტრუქტურაზე ოქტომბრიდან ფართომასშტაბიან თავდასხმებს ახორციელებს, რასაც კიევი და მისი მოკავშირეები მშვიდობიანი მოსახლეობის დაზარალების მიზნით დაწყებულ მიზანმიმართულ კამპანიად აფასებენ.