ევროკომისიის პრეზიდენტმა ურსულა ფონ დერ ლაიენმა და შვედეთის პრემიერ-მინისტრმა ულფ კრისტერსონმა შვედეთის მიერ ევროკავშირის თავმჯდომარეობის გადაბარებამდე ერთობლივი პრესკონფერენცია გამართეს. BBC-ის ინფორმაციით, მათი საუბრის მთავარი საკითხები უკრაინაში მიმდინარე ომსა და უკრაინის ევროკავშირთან ურთიერთობას შეეხო.

მედიასაშუალების ინფორმაციით, ურსულა ფონ დერ ლაიენმა განაცხადა, რომ ევროკავშირის ფინანსური დახმარების პირველი ტრანში 2023 წელს, რომელიც 18 მილიარდ დოლარს შეადგენს, უკრაინას იანვარში გადაეცემა და ეს იქნება პარტნიორი ქვეყნისთვის ევროკავშირის დახმარების ყველაზე დიდი ტრანში.

ასევე აღინიშნა, რომ თებერვალში ევროკავშირის საბჭო ეწვევა უკრაინას და ქვეყნის მთავრობასთან შეხვედრას გამართავს.

პრესკონფერენციაზე ითქვა, რომ ომის დაწყებიდან რუსეთმა ევროპაში გაზის მიწოდების 80% შეწყვიტა, მაგრამ ევროპა ახერხებს მიწოდების დივერსიფიკაციას.

„შრომამ შედეგი გამოიღო. გაზზე ფასები დღეს უფრო დაბალია, ვიდრე რუსეთის შემოჭრამდე იყო", - აღნიშნა ფონ დერ ლაიენმა.