ბექა ოდიშარია - ჩვენი ხელისუფლების მოსვლისთანავე, მნიშვნელოვნად შემცირდა ემიგრაციული ნაკადები

ჩვენი ხელისუფლების მოსვლისთანავე, ემიგრაციული ნაკადები მნიშვნელოვნად შემცირდა, - ამის შესახებ დიასპორისა და კავკასიის საკითხთა კომიტეტის თავმჯდომარე ბექა ოდიშარიამ პარლამენტის პლენარულ სხდომაზე განაცხადა.

მისივე თქმით, მიგრაციასთან დაკავშირებით „ქართული ოცნების“ თავმჯდომარის, ირაკლი კობახიძის მიერ სოციალურ ქსელში გავრცელებულ განცხადებას „გაუთვითცნობიერებელი ხალხისგან, მავნებლებისგან დაუსაბუთებელი კრიტიკა მოყვა“.

„სახელმწიფო გადატრიალებამ ქვეყანაში, არსებულმა განუკითხაობამ, შეიარაღებულმა კონფლიქტებმა და ეკონომიკურმა კოლაფსმა საქართველოდან მიგრაციის დიდი ტალღა წარმოქმნა 90-იან წლებში. ეს მძიმე მემკვიდრეობა გვერგო, მაგრამ 2012 წლიდან, ჩვენი ხელისუფლების მოსვლისთანავე, ემიგრაციული ნაკადები მნიშვნელოვნად შემცირდა. 2018-2021 წლებში საქართველოს მიგრაციულმა სალდომ 29 000-ს მიაღწია, მაშინ, როდესაც ჩვენს პარტნიორ და მეგობარ ქვეყანაში - ლიეტუვაში ეს მაჩვენებელი 37 000-ს უტოლდება. ასეთ საკითხებზე თავის „ფეისბუქ“ პოსტში ჩვენი პარტიის თავმჯდომარე ირაკლი კობახიძემ ისაუბრა, რასაც გაუთვითცნობიერებელი ხალხისგან, მავნებლებისგან დაუსაბუთებელი კრიტიკა მოყვა“, - განაცხადა ბექა ოდიშარიამ.

მისი თქმით, ევროპული კომისიის ანგარიშის თანახმად, მას შემდეგ, რაც ქვეყნებმა უვიზო რეჟიმი მიიღეს ან შენგენის ზონაში გაერთიანდნენ, მიგრანტთა რიცხვი გაიზარდა.

„თანამედროვე ეპოქაში მიგრაცია აღარ განიხილება როგორც ცალსახად მხოლოდ ნეგატიური მოვლენა, თუმცა საჭიროა მიგრაციული პროცესების გონებრივი მართვა და დარეგულირება. თანამედროვე მსოფლიოში, ევროკავშირსა და სხვა განვითარებულ ქვეყნებში დროებითი, ცირკულარული შრომითი მიგრაცია არის აღიარებული ამის პრევენციად. ესტონეთი, რომელიც არის ჩვენი მეგობარი ქვეყანა, მას შემდეგ რაც გამოეყო საბჭოთა კავშირს და დაიწყო აღორძინების ხანა, ევროპული ინტეგრაცია, რისკენაც ჩვენ მივისწრაფვით, მოსახლეობის 1/3 -ის გერმანიაში გადინება მოხდა. ასეთივე სურათი აქვს საბერძნეთს, სადაც 500 000-ზე მეტმა ადამიანმა გადასვლა სხვა ქვეყნებში მოახერხა“, - აღნიშნა ბექა ოდიშარიამ.