უნგრეთის პარლამენტმა შვედეთისა და ფინეთის ნატოში გაწევრიანების რატიფიცირების შესახებ კენჭისყრა გადადო.

ინფორმაციას ამის შესახებ Associated Press-ი პარლამენტის გადაწყვეტილებაზე დაყრდნობით ავრცელებს.

აქამდე, პარლამენტის სხდომების დღის წესრიგში აღნიშნული იყო, რომ სკანდინავიური ქვეყნების ნატოში გაწევრიანების შესახებ კენჭისყრა 6-9 მარტის პერიოდში გაიმართებოდა. ახლა კი საუბარია იმაზე, რომ კენჭისყრა პარლამენტის სესიის განმავლობაში ჩატარდეს, რომელიც 20 მარტს დაიწყება.

გამოცემა აღნიშნავს, რომ უნგრული დელეგაცია შვედეთის პარლამენტის სპიკერს ანდრეას ნორლენს და სხვა კანონმდებლებს სტოკჰოლმში 7 მარტს შეხვდება. შეხვედრაზე შვედეთის ნატოში გაწევრიანების რატიფიცირების პროცესი იქნება განხილული.

ცნობისთვის, ჩრდილოატლანტიკური ალიანსის 30 წევრი ქვეყნიდან ფინეთისა და შვედეთის ალიანსში გაწევრიანების რატიფიცირება დღემდე მხოლოდ თურქეთმა და უნგრეთმა არ მოახდინეს.