გარწმუნებთ, რომ 99%-ს, რომელიც დღეს შფოთავს, კანონი ან წაკითხული არ აქვს, ან შეიძლება იურისტის დახმარების გარეშე ჰქონდეს წაკითხული, - ამის შესახებ "ქართული ოცნების" თავმჯდომარემ, ირაკლი კობახიძემ განაცხადა.

მისივე თქმით, მთავარი ტყუილი, რასაც საზოგადოებას ე.წ. აგენტების კანონპროექტებთან დაკავშირებით აჯერებენ არის ის, რომ თითქოს ადამიანები აგენტებად ან ჯაშუშებად შეირაცხებიან.

"იქნება რეესტრი, სადაც წარმოდგენილი იქნებიან არასამეწარმეო იურიდიული პირები და მედიასაშუალებები, რომელთა დაფინანსება აღემატება 20%-ს და საუბარია იმაზე, რომ ისინი უზრუნველყოფენ უცხოური გავლენების რეალიზებას ჩვენს ქვეყანაში. ამის იქით არაფერზე არაა საუბარი. მათ დაევალებათ ერთადერთი რამ - ყოველწლიური ფინანსური დეკლარაციის წარმოდგენა. ეს არის მთელი შინაარსი ამ კანონპროექტის, თუმცა უამრავი ადამიანი, რომელიც ამასთან დაკავშირებით დღეს შფოთავს - მე გარწმუნებთ, რომ 99%-ს კანონი ან წაკითხული არ აქვს, ან შეიძლება იურისტის დახმარების გარეშე შეიძლება ჰქონდეს წაკითხული", - განაცხადა კობახიძემ.