დავით მათიკაშვილი - მეორდება ის, რაც წლების წინ ხდებოდა, როცა „ნაცმოძრაობა“ ევროსტრუქტურების დერეფნებში დადიოდა და პარტნიორებს ემუდარებოდა, ჩვენთვის სავიზო რეჟიმის გამარტივება არ დაეშვათ
მეორდება ის, რაც ევროკავშირთან ასოცირების შეთანხმების ხელმოწერამდე და ჩვენთვის ვიზალიბერალიზაციის მონიჭებამდე ხდებოდა რამდენიმე წლის წინ. საზოგადოებას შევახსენებ იმ სამარცხვინო ფაქტებს, თუ როგორ დადიოდნენ „ნაცმოძრაობის“ კონკრეტული წარმომადგენლები ევროკავშირის სტრუქტურების დერეფნებში და როგორ ემუდარებოდნენ პარტნიორებს, არ დაეშვათ საქართველოსთან სავიზო რეჟიმის გამარტივება, რადგანაც ეს მათ პარტიულ ინტერესებში არ შედიოდა, - ამის შესახებ საპარლამენტო უმრავლესობის წევრმა დავით მათიკაშვილმა პარლამენტის პლენარულ სხდომაზე განაცხადა.
მისი თქმით, დღესაც ასე გრძელდება, კერძოდ კი, „ზოგიერთმა“ მთავარ საქმედ პოლარიზაცია და რადიკალიზაცია დაისახა და ევროპულ სტრუქტურებში აგიტაციას ეწევა, რათა საქართველომ კანდიდატის სტატუსი არ მიიღოს.
„ელექტორალურად სრულიად გაკოტრებული „ნაციონალური მოძრაობა“ და მისი დანამატები, რომელთაც არჩევნების გზით ხელისუფლებაში დაბრუნების არანაირი შანსი არ აქვთ, არ აკლებენ მცდელობას, გააღრმაონ რადიკალიზაციის ნიშნული, ტყუილების პროპაგანდით საზოგადოებაში გამოიწვიონ ტემპერატურის აწევა და ძალადობით დააბრუნონ სააკაშვილი ხელისუფლებაში“, - განაცხადა დავით მათიკაშვილმა.
ამასთან, დავით მათიკაშვილის თქმით, ანტიკონსტიტუციურ მისწრაფებებს ყოფილი პრეზიდენტი გიორგი მარგველაშვილიც იზიარებს და „არჩევს, რომელ რადიკალთან ითანამშრომლოს - კეზერაშვილთან, გახარიასადა მერაბიშვილთან“.
„ამ ლიბერალურ-ბოლშევიკურ-ფაშისტური დაჯგუფების მიზანია სიცრუის პროპაგანდით, საკუთარი ქვეყნის მტრობით მიაღწიონ საწადელს, რათა საქართველომ არ მიიღოს კანდიდატის სტატუსი“, - აღნიშნა დავით მათიკაშვილმა.
